Issittumi Sakkutooqarfiup piniartunik akornusersuineq ajuusaarutigigaa

Issittumi Sakkutooqarfiup umiarsuaa arfanniartut umiatsiaaraannit umiatsiaaqqat eqqannguanni ingerlanini ajuusaarutigaa.

Sapaatit akunnerata siuliani pisoq videoliarineqarpoq, inuillu internettikkut attaveqaqatigiiffiisigut kingorna saqqummiunneqarluni.

Umiarsuup piniartunik akornusersuinera umiarsuup naalagaata nassuerutigaa, pisorlu ajuusaarutigalugu KNR-imut allalluni.

- Ejner Mikkelsen piffissami tassani suliaqariartorpoq. Piniarnermik akornusersuinissaq soorunami siunertarinngikkipput erseqqissaassutigissavara, umiarsuup naalagaa allappoq.

Issittumi Sakkutooqarfik naapertorlugu umiarsuup umiatsiaaqqat nigorsimaniaraluarpai.

- Ejner Mikkelsen umiatsiaaqqat ataatsimooraangata avaqquteriartarpai, umiatsialli tamatigut siaruariarlutik allami katersuuteqqittarput. Ejner Mikkelsenip kimmut umiatsianit sapinngisamik ungasissukkoorniarsarivoq, umiatsiartullu puullaaqitinniarnagit sammivimmik sukkassutsimillu aalajangersimasumik ingerlalluni.

- Arferit kujammukartut aatsaat tassani takuagut, Issittumi Sakkutooqarfik allappoq.

KNAPK-llu pisumut nassuiaateqartoqarnissaa ataasinngormat piumasaraa.

- Issittumi Sakkutooqarfik tamassumunnga suli nassuiaateqanngimmat, KNAPK pisimasumut piaartumik nassuiaammik piumasaqaateqarpoq, kattuffik ammasumik allagaqarluni ataasinngormat allappoq.

Suliaq naammassisoq

Issittumi Sakkutooqarfilli naapertorlugu illuatungeriit maanna oqaloqatigeereerput, tamarmillu Issittumi Sakkutooqarfimmit akissuteqarnissamut suliaq naammassisutut isigaat.

Tamanna aamma KNAPK-mit uppernarsartinniarlugu kattuffik attaveqarfiginiarsarigaluararput, KNAPK-lli siulittaasua ataatsimiimmat marlunngornermat iluatsinnagu.

Imarsiornermi attaveqaqatigiinnissaq atorfissaqarpat, kanaalip 16-ip atorneqartarnissaa Issittumi Sakkutooqarfiup kajumissaarutigaa.