Umiarsuit takornarniartaatit ilisimannilluartunik inuttaqartariaqarput

Imaani annaassiniartarneq pillugu suleqatigiinneq ataqatigiissaarinerlu nunat avannaamioqatigiit killiit suli annertusartariaqarpaat. Nunat Avannarliit Killiit Siunnersuisoqatigiiffiat Savalimmiuni illoqarfimmi Tórshavnimi sammisaqartitsilluni ataatsimiimmat tamanna tamakkiisumik isumaqatigiissutigineqarpoq. Ataatsimiinneq sapaatip akunnerani kingullermi ulluni arlalinni pereerluni sapaatip akunnerata naanerani naammassineqarpoq.
juunip 09-at 2008 06:13

Sammisaqarnermut atatillugu Savalimmiuniit, Islandimiit Danmarkimiillu annaassiniartartut tallimat ataatsimoorlutik pernaammik suleqatigiissinneqarput.

Ataatsimiinnermi peqataapput nunani avannaamioqatigiinni, tassa Norgemiit, Sverigimiit Danmarkimiillu, ministerit inatsisartunullu ilaasortat, taakkulu tamarmik nunani avannaamioqatigiinni annaassiniartartuni qullersanut ilaapput, ataatsimeeqataasullu 50-it sinneqarput.

Kalaallit Nunaaniit peqataapput nunanut allanut tunngassuteqartunut naalakkersuisoq, Aleqa Hammond, aamma Inatsisartut siulittaasuat, Ruth Heilmann.

Isumaqatigiissutigineqarpoq nunat avannaamioqatigiit immamik avatangiisillit imaani isumannaallisaanikkut annaassiniarnikkullu suliniaqatigiiffeqassasut, tamaanilu tamanna nukittorsarneqassasoq. Umiarsuit ilaasartaatit, assartuutit uuliamillu assartuutit tamaani angalasartut ukiuni kingullerni amerleriarsimaqaat, siunissamilu suli amerliartortussaassallutik.

Siunnersuutigineqarpoq imaani ajunaartarnerit pinngitsoortinniarnissaat anguniarlugu iliuuseqartoqarnerusariaqartoq. Soorlu nunani avannaamioqatigiinni umiarsuarni takornarniaatini assartuutinilu immamik ilisimasaqarluartut sulisorineqartassasut, tamaanilu immap assingi nutaanik ilaartorneqartassasut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq