Umiarsuit takornariutit tikittartut amerliartorput

Umiarsuit takornarianik ilaasartaatit Kalaallit Nunaat ornissallugu orniginerujuartuinnarpaat taamatut ineriartortoqarnera Kalaallit Nunaanni Takornariaqarnermi Inuussutissarsiornermilu Siunnersuisooqatigiit ukiuni tullittuni taamatut ingerlaannarnissaa naatsorsuutigaat.

Maani Nanortalimmi allatut ittumik aaqqissuussisarpugut, illoqarfitsinnut tulluarsakkamik

Umiarsuit takornarianik ilaasartaatit sungiusimasaanniit allaanerusumik aaqqissuussisarluta.

Takornariat tikikkaangata inuit tamarmik ikioqatigiillutik sullittarput.

Uangalu suliassara tassaasarpoq peqatigiiffiit assigiinngitsut takornariaqalersillugu nalunaarfigiortornissaat, soorlu makku;

Arnat Peqatigiit, Erinarsoqatigiit, Kalattoortartut, Qajartortartut peqatigiiffiat, allarpassuillu.

Katersugaasiviup eqqaani qangatut amiinnarnik atisalersorsimasunik qanga inuuneq takutinniarlugu kalallit illuata ujaqqanik issunillu qammallip eqqaani takutitsisoqartarpoq, umiat, qajartortullu takutinneqartarput, puisinik pilattoqartarluni qangatullu nerisassiortoqartarluni, oqaluffimmi erinarsoqatigiit tusarnaarneqarsinnaallutik, Kalattut qittattunik alutorsartoqarsinnaalluni, Arnallu Peqatigiit suliaat aamma saqqummiunneqartarlutik. Takornarianut taamaalilluta illoqarfik iluitsunngorlugu tuniniartarparput, illua´tungaanilu aamma pisiniarfiit pisiniarfigineqarsinnaallutik. Maanilu sanalukkanik pisiniarfik assorsuaq takornarianik pisiniarluarfigineqartarpoq, illoqarfitsinni sanaluttartut sanaavi tassani aamma nioqqutigineqartarmata.

Taama oqaluttuarpoq; Niels Tækker Jepsen. Nanortalimmi takornariaqarnermik pisortaasoq.