Umiarsuit takornariartaatit nunarput radarimiisippaat
Nunatsinni Takornariarnermi Inuussutissarsiornermilu Siunnersuisoqatigiit umiarsuarsuarnut ilaallutik Nunatsinnut takornariarusuttunik ussassaarillutik maanna ulapileruttorput. Umiarsuarsuarnik takornariartitsisarneq pillugu ussassaarinerit Europami annersaani, Tysklandimi Hamborgimi Seatrade Europemi, tamanna pivoq.
- Umiarsuarnik angalatitseqatigiit Europameersut arlallit alakkarpaatigut. Taakku tamarmik oqaatigaat ukiormanna Nunatsinnut angalatitsinertik iluatsilluarsimasoq, amerlanersaasalu aappaagu takkuteqqinnissartik naatsorsuutigaat, GTE-mi siunnersorti Malik Milfeldt oqarpoq.
Umiarsuarsuit takornariartaatit Nunatsinni aningaasanik isaatitseqataanerat, umiarsuit tikittut marluk naatsorsuiffiginerini takuneqarsinnaavoq.
Soorlu umiarsuaq "Esmerald Princess" 3.080-inik ilaasoqarluni Qaqortumeeqqammerpoq. Naatsorsuinermi paasinarsivoq, Nunatta karsiata ilaasunut akitsuummit 1,6 millionit koruunit isertissimagai. Tamatuma saniatigut takornarianut pisiniarfik millionit affaanik kaaviiaartitsivoq. Tamatumalu avataatigut Qaqortormiut tuniniaanermikkut aaqqissuussinertigullu qanoq amerlatigigaluarnersunik aningaasarsillutik.
Ukiormanna siusinnerusukkut takornarianik angallassissut "Costa" Nuummut Ilulissanullu aqqusaarami ilaasunut akitsuutaannarnut 3 millionit koruunit sinnilinnik akiliuteqartoq, Malik Milfeldtip ilisimatitsissutigaa.
