Umiarsuarnik takornariartaatinik isumaginninneq pitsanngorsarniarneqarpoq
Niuerfeeqqanik angallattakkanik, tuniniaasartut tuniniagaannik takussaanerulersitsisussanik pilersitsinissaq ilaatigut siunertaavoq.
Umiarsuarsuit takornariartaatit tikinnginnerini tikereernerannilu ataqatigiissaarineq ataatsimiititaliap aamma suliarisassavaa.
Nunani allamiut umiarsuarsui takornariartaatit Nuummut tikikkaangata, takornariat nunamut ikaaraangamik illoqarfimmi takusassarsiortut ukiorpaalunni takussaasarput.
Taava sanaluttartut tulleriiaarlutik kusanartuliaminnik tuniniaaffigisarpaat. Tamannali aaqqissuussaanngippallaaqaaq, takornariallu ilaatigut pisiumallutik sanaluttartut malersukujoortarpaat, Nuummi takornarianik sullissisartut ilaat Grace Heindorf Nielsen oqarpoq.
- Umiarsuarsuarnik takornariartaatinik isumaginnittussap ataatsimiititaliap takornarianik niueqateqarneq pitsaanerusumik aaqqissuuttassavaa, taamaalilluni takornariat tuniniaasullu pitsaanerusumik sullinneqartarniassammata, Kommuneqarfik Sermersuumi inuussutissarsiornermut siunnersuisoqatigiinneersoq Sarah Thode Andersen oqarpoq.
Suliniut ilaatigut Nunatta Katersugaasivia, Nuummi eqqumiitsulianik Katersugaasivik, Touring Greenland, Inuk Hostels aamma sanaluttartut peqatigiiffiat "Sikkerneq" peqatigalugit pilersinneqarpoq.
