Umiarsuarmik takornariarneq allanngoriartorfiuvoq
![](/sites/default/files/styles/image_934x467/public/article_images/theworldsm.jpg?itok=tlCx_qDu)
Umiarsuarnut takornariartaatinut Kalaallit Nunaanni umiarsualivinnut aqqusaartunut ilaasut amerlassusaat 29.826-init 23.399-inut appariarsimapput. Appariaatip affaa umiarsuit takornariartaatit 3000-inik amerlanerusunilluunniit ilaasullit sila pissutigalugu Kalaallit Nunaanni umiarsualivinnut aaqqusaanngitsoornerinik nassiuaatissaqarpoq.
-Kalaallit Nunaannut umiarsuarluni takornariarneq ukiuni kingullerni allanngorsimavoq. Siornatigut umiarsuit akunnattumik angissusillit 600-800-nik ilaasullit Nunatsinni sumiiffiit sisamat aqqusaartarpaat, taakkuninnga 2012-imi takusaqanngivippugut. Paarlattuanilli umiarsuit takornariartaatit angisoorsuit 300o-inik amerlanerusunilluunniit ilaasullit tikittalerput, aamma umiarsuit mikinerit takornarianik 100-300-nik ilaasullit amerlanerupput, Anders la Cour Vahl, Visit Greenlandimi pisortap tullersortaa knr.gl-imut oqaluttuarpoq.
Umiarsuit mikinerusut Nunatsinni umiarsualiviit amerlanerusut aqqusaarsinnaavaat, takornariallu amerlassussaat appariartoraluartoq Nunatsinni aningaasatigut isaatitsiffiunera taamaaqataanik annikilliartunngilaq. Ilaanni killormorluinnaq pisoqartarpoq.
-Takornarianit isertitat kisiisa iluanaarutaaneq-ajorput. Aammattaaq uuliamik nerisassanillu pilersuisut kalaallit aningaasanik isaatitsilluartarput, aningaasalli takornariat illoqarfinni aqqusaakkaminni atortagaasa pingaaruteqartorujussuunerat aamma qularutissaanngilaq. Umiarsuilli umiarsualiviit aqqusaagaat amerliartortillugit isertitat qujanartumik qaffakkiartortarput, taamaammat takornariat Kalaallit Nunaannut umiarsuarmik tikittut ikiligaluartut isertitanut sunniuteqanngitsoorsinnaapput, Anders la Cour Vahl oqarpoq.
Umiarsuit takornariartaatit nunarsuarmi nutaaliaanersaat akimarpalunnersaallu "The World" siorna Nunatta imartaaniippoq, aamma umiarsuarujussuit allat siorna Nunatsinniissimapput.
-Umiarsuit takornariartaatit akimarpaluttut Nunatsinnut tikittarnerat soorunami nuannaarutigaarput. Ilaasuisa aningaasaateqarluarneri annertuumillu pisiortornissaminnut tunuarsimaannginnerat qularnanngilaq. Umiarsuit takornariartaatit ilaasoqassusaat naapertorlugu aamma annertuumik aningaasatigut isaatitsissutaasarput. Misissuinitsigut paasivarput umiarsualivinni umiarsuit aqqusaartagaanni sisamaasuni 4 millioner koruunik sinnerlugit atorneqartartut, Anders la Cour Vahl nassuiaavoq.