Umiarsuarmik ilaasartaatinik angallassineq suleqatigiissutigineqalerpoq

Royal Arctic Linep Air Greenlandillu siulersuisuisa ullumikkut akuersissutigaat, ingerlatseqatigiiffik nutaaq Arctc Umiaq Line A/S-imik taaguutilik aqqutigalugu sinersortaat Sarfaq Ittuk pisiarineqassasoq, taamaasillunilu Royal Arctic Line Air Greenlandilu suleqatigiillutik sinerissami Narsarsuarmiit Ilulissat tungaanut umiarsuarmik angallanneq ingerlatarilissavaat. Royal Arctic Linemi ulluinnarni akisussaasoq Taatsiannguaq Olsen ima oqarpoq:

- Aappaagumiit poorski sioqqutilaarlugu umiarsuaq sinersulissaaq, januaarillu aallartilaarnerani unittassalluni. Umiarsuaq ataasiinnaammat Uummannaq Upernavillu ilanngunneqarsinnaanngillat, aammalu illoqarfinni taakkunannganinngaanniit angalasartut ikittuinnaasarmata avannarpasinnerusut ilanngunneqanngillat. Taatsiannguaq Olsen oqarpoq nangillunilu: - Angallannermi atuisartussat naatsorsuutigisinnaassavaat, ataqatigiinnerusumik angallannerup aaqqissuunneqarsinnaalernera. Umiarsuarmulli ilaanermut akit qaffalaartussaassapput, agguaqatigiisillugu 100 koruunip missaannik. Neriuutigaarput umiarsuarmik ilaasunik angallassineq imminut akilersinnaasumik ingerlanneqarsinnaajumaartoq.

Royal Arctic Linep ulluinnarni ingerlanneqarneranut akisussaasoq Taatsiannguaq Olsen taama oqarpoq. Air Greenlandimi allaffissornermik pisortaq Flemming Knudsen oqarpoq, nuannaarutigalugu umiarsuarmik timmisartumillu angallassineq suleqatigiiffiusumik ingerlalernissaa erinisuutigalugu. Umiarsuaq ilaasartaat Sarfaq Ittuk 9,5 million koruunilerlugu suleqatigiilersunit pisiarineqassaaq.