Umiarsuarmi naarluuttut oqaluttuarput

Ilaasartaammi M/S Fram-imi norskinit pigineqartumi, oqaluttuareriikkatsituut ilaasorpaalunnguit tunillannartumik naarluussimapput, ilaasunillu allanut tunillaasuuttoqalinnginnissaa anguniarlugu, ilaasut tunillatsissimasut ilaasunit allanit avissaartinneqarsimapput.

Ilaasuni naarluussimasunut avissaangatinneqartunut ilaavoq radioaviisimi suleqaterput Karten Sommer:

Unnuat ulaanni naarlullunga timmippunga, ullullu aappassaani sygeplejerskemit iisartakkamik tunineqarpunga kapineqarlungalu. Nunamullu tikikkatta niullunga angalaarusaarpunga. Umiarsuarmut uterama, nakorsap takulerlunga oqarfigaanga, inuit akornanni angalaassanngitsunga, ineqqanniiginnarallassasungalu, sunaaffa ullut marluk, kahytinniittussaasimallunga, aammami ilaasunut allanut tunillaassuinnginniassagama, Karsten Sommer oqaluttuarpoq nangillunilu: Kahytinniikkama isumagilluarneqaqaanga, nerisassanik allanillu amingaatinnik pajunneqartarlunga. Soorunami uggornaraluarpoq, tikiffiit ilaanut niusinnaanani, kisianni tassa umiarsuup naalagaata tamanna piumasarisimavaaa, aammami ilaasunut allanut tunillaassuuttoqalinnginnissaa anguniaramiuk. Tassa allatut ajornaqaaq, Karsten Sommer naarlussimasoq oqaluttuarpoq.

Ilaaffigisarput nuanneqaaq, ipiitsuullunilu, kisianni tassa naarluuttut assammissimagaanni, imaluunniit attorsimasaat attoraanni, tassa kisianni naarlulerluni. Taamaattumik umiarsuarmut ikeqqaaratta oqarfigineqarpugut, assagut akulikitsumik errortassagigut. Aamma umiarsuarmi sullissineq ajunngilluinnarpoq, taamaalillunilu naarluunnerup tunillaassuunnera unitsinneqarpoq, Karsten Sommer naggasiilluni taama oqaluttuarpoq.