Nalunaarutiginninneq: Umiarsuarmi alapernaarsuummi inuttat Nuna allanngutsaaliukkami umimmammik pisaqartut
Suliaq sulisunut tunngassuteqartoq Illersornissamut qullersaqarfimmi suliarineqaleruttorpoq. Illersornissamut qullersaqarfiup umiarsuaani alapernarsuummi pisortaq, umiarsuarmut inuttanullu qullersaalluni akisussaasuusoq, tunuartitaavoq.
Umiarsuarmi inuttat pissutsinut arlalinnut - ilaatigut Tunup avannaarsuani Nuna allanngutsaaliukkami umimmammik eqqissisimatitamik pisaqarsimasutut - pasineqalernerisa kingorna tamanna pivoq.
KNR-ip illersornissamut qullersaqarfimmut allagaatinik takunnikkumalluni noqqaassuteqarnerata kingorna tamanna paasinarsivoq.
Suliami pineqartut:
- Umiarsuup ilisimatusartunik ilaasoqarluni Tunumut angalanerani umimmaap aallaaneqarsimanera.
- Nioqqutit akuerisaanngitsut akiliutigalugit Ittoqqortoormiini qilalukkat tuugaavinik pisisoqarsimanera.
- Aalisanermik nakkutilliisoqarnerani aalisakkanik pisisoqarsimanera.
- Umiarsuarmit aalisartoqarsimanera.
Najoqqutarisat: Allagaatinik takunnissinnaatitaaneq, Illersornissamut qullersaqarfik.
Inuttat pissutsini sisamani siorna ukiarsariartulernerani ukiakkullu pisimasorineqartuni akuusimasutut pasineqartut allagaatini atuarneqarsinnaavoq.
Qilalukkat tuugaavinik "nioqqutit akuerisaanngitsut" akiliutigalugit pisisimasutut aalisarnermillu nakkutilliinerminni aalisakkanik pisisimasutut pisuutinneqarput.
"Nioqqutit akuerisaanngitsut" suuneri nassuiartissinnaasimanngilarput, soorlu aamma aalisarnermik nakkutilliisoqarnerani aalisakkanik pisisoqarnerani qanoq pisoqarsimanera sukumiinerusumik nassuiarneqarsinnaanngikkallartoq.
Suliaq misissuiffigineqarpoq
Illersornissamut qullersaqarfiup suliaq oqaaseqarfigerusunnagu ilisimatitsissutigaa, imali allalluni:
- Suliat sulisunut tunngassuteqartut pineqarput, inerneqarnissaallu utaqqivarput. Danmarkimi naalagaaffeqatigiillu sinnerani inatsisinik atuuttunik unioqqutitsineq Illersornissamut qullersaqarfiup akuerisinnaanngilaa.
Sakkutuuni suliassiissutit pillaatissartallit misissuiffigineqartarnerat Illersornissamut ministeqarfiup inatsisilernermut allaffeqarfiata suliassaraa, sakkutuunilu inatsisilerituup Claus Risbjergip KNR-imut uppernarsarpaa suliamut tunngatillugu paasissutissanik katersisoqarlunilu misissuisoqartoq.
Kina nalunaarutiginnittuunersoq ilisimaneqanngilaq.
Nuna allanngutsaaliugaq Issittumi Sakkutooqarfiup umiarsuaanit alapernaarsuutinit ukiut tamaasa sikuernerani tikinneqartarpoq. Nuna allanngutsaaliugaq immikkut ittumik eqqissisimatitaavoq, umimmanniarnerlu inerteqqutaalluinnarluni.
Umiarsuarni alapernaarsuutini inuttat nuna allanngutsaaliukkami politiitut piniarnermillu nakkutilliisutut atuuffeqarput. Nunap nakkutiginissaa imartaanilu aalisapiluttoqannginnissaa nakkutigissallugu suliassaraat, aammattaaq sakkutuujunngitsunik ikiuinissartik suliassarigaat Issittumi Sakkutooqarfiup suliassai pillugit Illersornissamut ministereqarfiup nalunaarusiaani atuarneqarsinnaavoq.
Pasilliutigineqartut ilumuussappata, pasineqartut sumiiffimmi suliassaminnut paarlangalluinnartumik iliorsimassapput.
