Umiarsuaq ukiornissaanut peqqumaatissanik pilersuisoq sikorsuarnit ingerlasinnaajunnaaqqasoq
Royal Arctic Linep containerinik assartuissutaa, Malik Arctica Ittoqqortoormiit eqqaanni sikorsuarmi ingerlaqqissinnaajunnaaqqavoq. Umiarsuaq ukiornissaanut peqqumaatissanik useqarpoq.
Umiarsuaq inuttallu navianartorsiunngillat, sikoqarnerani unammillernartoq, Royal Arctic Line nittartakkamini allappoq.
Umiarsuaatileqatigiiffiup Issittumi Sakkutooqarfik suleqatigalugu ”pisariaqartitsisoqalissagaluarpat sumiiffimmi isumannaallisaaneq annertusarniarpaat”.
RAL-ip ukiornissaanut peqqumaatissat nunamut nioqqarnissaat maanna sulissutigaa, Royal Arctic Linellu nioqqutissat nunamut nioqqarnissaat pillugu DMI-p sikunik alapernaarsuisui nioqqutissaarniarfillu KNI qanimut suleqatigai.
Sikoqassutsip ulluni qaninnerni pitsaanerulernissaa naatsorsuutigineqartoq, Royal Arctic Line allappoq.
Malik Arctica 114 meterinik takissuseqarpoq containerinillu 20 fodsinik 606-inik useqarsinnaalluni.