Umiarsuaq takornariartaat ikkarlittoq
Nittartakkami maritimedanmark.dk-mi taama allaaserinnittoqarpoq.
Umiarsuarmi takornariartaammi tassani ilaasut 74-iupput umiarsuullu inuttai 30-ullutik. Umiarsuarlu kivinissaminut navianartorsiunngitsoq oqaatigineqarpoq.
Umiarsuit arlallit annaassiniariartortinneqarput. Aamma Spaniamiut sakkutuuisa umiarsuaaneersut aqqartartut ullumi kingusinnerusukkut umiarsuup itsernga misissorniarpaat.
Umiarsuaq takornariartaat ukiuunerani Amerikamiut takornariartitseqatigiiffiannit Quark Expeditionsimit angalatinneqartarpoq. Aasakkullu Danmarkimi takornariartitseqatigiinnit Albatros Travelimit attartorneqartarpoq, ilaatigullu Nunatta sineriaani angalatinneqartarluni.