Umiarsuaq takornariartaat ikkarlittoq

Ilaasut 118-it sikunik aserorterummut Canadamiut sinerissamik nakkutilliissutaata pigisaanut qimarngussorneqarput. Taakkua tamarmik ajunngitsut nalunaarutigineqarpoq. Taama allappoq maritimedanmark.dk. Ikkarlinneq tallimanngormat pivoq.

Clipper Adventurerip ikkarluk, immap assingani nalunaaqutserneqarsimanngitsoq eqqormagu ajoqusertoqanngilaq.

Umiarsuaq takornariartaat Port Epworthimiit Kugluktukmut ingerlaaraluarpoq.

Umiarsuaq uersimavoq immassimaneranilli taamatullu mingutsitsineranik malunnartoqarani.

Canadamiut sikunik aserorterutaat Amundsen ajutoortumut sapaatiummat annguppoq, silagikkallartillugulu ilaasut tamarmik sikunik aserorterummut nalunaaquttap akunnerisa sisamat ingerlaneranni qimarngussorneqarlutik.

Ilaasut maanna Kugluktumut ingerlanneqassapput tassanngaanniillu Edmontonimut timmisartuunneqassallutik.

Clipperip takornariartaataani inuttat 69-it suli umiarsuarmiipput, ulinngatillugulu umiarsuaq nammineerluni kaanngarniartarsimagaluarpoq iluatsitsinanili.

Clipper Adventurer umiarsuaatileqatigiinnit Clipperimit Københavnimi pigineqartunit aallaaveqarpoq, taamaattorli Miamimi International Shipping Partnersimit ingerlanneqarluni.