Umiarsuaq karrinik usisoq Ukrainep umiarsualiveqarfianit avalattoq
Umiarsuaq karrinik 7000 tonsinik usisoq Ukrainep umiarsualiveqarfianit avalappoq. Atorfillit russinut ataniartuneersut taama oqartut, nutaarsiassaqartitsivik AFP allappoq.
Tyrkiamiut umiarsuaat assartuut Ukrainep umiarsualiveqarfianit Mariupolimit sapaatit akunnerata siuliani avalappoq. Tyrkia Ruslandilu karrinik Ukrainemit avammut nioqquteqarneq pillugu inerneqartussamik isumaqatiginninniareersullu taama pisoqarpoq.
Nunarsuarmi inuussutissaqarnikkut ajornartorsiortoqalinnginnissaa Ruslandip suleqataaffigissagaa, russit nunanut allanut ministeriat, Sergej Lavrovi, Naalagaaffiit Peqatigiit qullersaannut, António Guterresimut, pingasunngornermi neriorsuivoq. Ruslandili qanorpiaq suleqataaniarnersoq, Lavrovip ilisimatitsissutiginngilaa.
AAMMA ATUARUK Naalagaaffiit Peqatigiit Somaliami kaannersuaqarnera aarlerisaarutigigaat
Karrinik Ukrainep umiarsualiveqarfianit avammut isumannaatsumik nioqquteqarneq pillugu isumaqatiginninniarnertik nangissagaat, russit tyrkiamiullu aallartitaat sapaatit akunnerata siuliani pingasunngornermi isumaqatigiipput. Ruslandip illersornissamut ministereqarfia tusagassiutinut taama nalunaarpoq.
Sovjetunioni karrinik Ukrainemit siornatigut nioqquteqartarpoq. Karrissaalatsineq peqqutaalluni inuussutissat nunani amerlasuuni akitsoriartornerat pakkersimaarniarlugu karrerpassuarnik avammut nioqquteqarniarneq Ruslandip Ukrainemi saassusinerata kingornali ajornakusuulerpoq.
Ruslandip inuussutissat nunani amerlasuuni akitsoriartornerannut pisuutitaanini akerlilerpaa.
