Umiarsuaq iluarsaassisartoq nunatsinnut aallartoq
Immap naqqatigut kaabilit pingasut ajoquteqarnerat pissutigalugu kujataani avannaanilu internetit arriinnerannik eqqugaasunut nuannersumik tusagassaqarpoq.
Immap naqqatigut kabelinik iluarsaassisartoq Horizon Enabler Canadamiit nunatsinnukarluni aallaqqippoq.
Tele-Post tusagassiuutinut nalunaaruteqarluni taama allappoq.
Taamaalilluni suliffeqarfiup ajutoornermik eqqugaaqqasup kabilit immap naqqani ajutooqqasut pingasut iluarsaanniarsarilerpai.
Tele-Post tusagassiuutinut nalunaaruummi ilisimatitsissutigaa, immap naqqaniittoq kaabili Sisimiut avannaanniittoq maajip aallartisimalernerani iluarsaallugu aallartinneqassasoq.
Iluarsaassineq qanoq sivisutigissanersoq suli ilisimaneqanngilaq.
- Iluarsaassineq qanoq sivisutigissanersoq aatsaat paasinarsissaaq immap naqqatigoortoq kabeli akkerneqareerpat inuttanillu misissorneqareerpat qanoq ajoqusersimatiginersoq, Tele-Post taama allappoq.
Sisimiut avannaani iluarsaassineq naammassippat, umiarsuaq Horizon Enabler kujataanukassaaq taqqavanilu iluarsaassinini nangillugu.
Pilersaarusiorneq immaqartalerujussuuvoq tassalu silap qanoq innera aalajangiisuussammat.
Qaqortup avataani sivisuumik anorersuarujussuarmat, umiarsuaq 10 april Tele-Postimit Canadamut utertinneqarpoq, kaabili immap naqqaniittoq arlaleriarlugu iluarsaateriaraluareerlugu.
- Pisarnertut TELE-POST silap qanoq issusaanut malinnaalluarpoq aamma pilersaarummut tunngatillugu suut tamarmik ammatinneqarput. Kalaallit Nunaata avannaani silarluppat umiarsuaq Qaqortuliassaaq tassanilu suliassat siulliullugit, Tele-Post tusagassiuutinut nalunaaruteqarluni taama allapoq.