Umiarsuaq DANA imartatsinnik misissuilerpoq
Umiarsuaq Hirtshalsimit ullumi aallassaaq, angalanermullu ataqatigiissaarisoq, ilisimatooq Danmarks Tekniske Universitetimeersoq Peter Munk angalanissaq pillugu ima oqarpoq:
- Immami uumassusilinnut pingaarutillit angalanitsinni misissorniarpavut, uumasut nerisariit misissuiffiginiaratsigit, soorluttaaq immap tarajuussusia kissassusialu misissorniarivut, Danmarks Tekniske Universitetip, naatsunngorlugu DTU-p, immamik ilisimatusarnermut immikkoortortaqarfianeersoq Peter Munk oqarpoq, nangipporlu:
- Issittup imaa kissatsikkiartuinnavissoq tusartarparput. Tamanna uumassusilinnut qanoq sunniuteqarnersoq paaserusupparput, Kalaallit Nunaannimi aalisarnermut atatillugu aamma qanoq kinguneqarnersoq paaserusunnarmat, ilisimatooq DTU-meersoq oqarpoq.
DANA-p imartatsinnik misissuinera Issittup Ukiorititaannut atatillugu aallartinneqarpoq, Pinngortitaleriffimmiillu Søren Rysgaard peqataalluni.
Pinngortitaleriffiup saniatigut misissueqataasussat tassaapput DTU-p immamik ilisimatusarnermut immikkoortortaqarfia, DTU Aqua, kiisalu Danmarkip avatangiisinut misissuisoqarfia, Danmarks Miljøundersøgelser.
Umiarsuaq DANA ullumi aallaruni juulip ulluisa 23-anni Nuup avataani Fyllas Bankenimi misissuilissaaq, Nuullu kangerluani aamma misissuisussaalluni.