Umiarsuaq assartuut kinngusoq

Sakkutuut imarsiortut qullersaqarfianniit Klaus Vinholdt ima oqarpoq:

- Nalunaaqutaq 15.15 nalunaarfigineqarpugut, umiarsuaq Lollandip Fimmerillu akornanni kivilersoq. Taama pisoqarmat pineqartumut aallartitsivugut, aamma Gedseriminngaanniit annaassiniartartunik tamaanngartoqarpoq. Aamma danskit tyskillu umiarsuaannik arlalinnik eqqaaniittoqarpoq kiisalu qulimiguulinnik sisamanik aallartitsivugut. Umiarsuarmi inuttaasut pingasut ajunngitsut qaqinneqarput, taakkunanngalu paasitinneqarpugut umiarsuup inuttai katillugit aqqaniliusut, aamma ataaseq ajunaarsimasoq nassaaraarput maannalu inuttat arfineq marluk suli nassaarineqanngillat, Klaus Vinholdt oqarpoq.

Inuttat ajunngitsut pingasut Russit umiarsuaannit qaqinneqarput ajunaarsimasorlu ataaseq sakkutuut imarsiortut qulimiguuliannit nassaarineqarpoq.

Inuttat suli nassaarineqanngitsut arfineq marluusut umiarsuarmiiginnarsimanissaat sakkutuut imarsiortut annilaanngatigaat taamaattunillu aqqartartunik ajunaarfimmukartitsiniarlutik. Maanna naliliinerit naapertorlugit umiartortut nalunaaquttap akunneri sisamat arfinillillu missaanni immami uumaniarsinnaapput, tassami immap kissassusaa 8 aamma 10 gradip akornanniimmat.