Umiarsualivik atorsinnaalerpaat
Umiarsualiviup atuutileqqinnissaa soorunalimi erniinnarluinnaq pisariaqarpoq, inuit 2 millionit inuussutissaqartinnissaat eqqarsaatigigaanni tamanna timmisartunut mittarfikkut taamaallaat pisinnaanngimmat, umiarsualivillu ammarneqartariaqarluni. Umiarsuit sorsuutit marluk Hollandimiunit ataaseq aappaalu Amerikamiunit pigineqartut inuussutissanik usingiarput, tamannalu ilorraap tungaanut ingerlariaqqinerulluni, umiarsualiveqarfilli tamarmi aserorneqarsimavoq soorluli tassa sorsuffiusimasoq, kranit umiarsualivimmiittut tamarmik uppikaasimapput, umiarsualiveqarfillu nakkaassimalluni atuutileqqinnissaalu suliassarujussuulluni.
Haitimiut nunaminnit imaatigut USA-mut ingerlaniarnissaat Amerikamiunit annilaanngatigineqarpoq, taamaaliortoqarsimanissaanilli malunnartoqarani, qimaaniartoqassagaluarunili taava taakkua immakkut nunap avataaliartussaapput nunalluunniit sanilianut Dominikanske Republikimukartussaallutik, umiarsualivimmili immap killingani tamanna malunnaateqarani. Imaatigut qimaaniarnissaq periarfissaqanngilaq angallataasinnaasunik takussaasoqanngimmat. Tamanna qangali Amerikamiunit annilaanngatigineqartarsimagaluarpoq, tassami ukiorpassuit matuma siornatigut Haitimiut imaq ikaarlugu USA-liarniartarsimammata. Tamatumani imaatigut angallatissat naammanngillat.
Umiarsualivimmi aseruatitersimanerit oqaluttuassaanngillalluunniit, umiarsualivik sunaaffa taama aseruatiterneqartigisinnaava. Haitimiut umiarsualiviup aseruatiternerani Amerikamiut nunap iluani atomimik qaartartuliamik misiliisimasoralugit eqqumiiginartumik isumaqarsimagaluarput.
Taama DR-imiit Thomas Ubbesen Haitimiit ajortisaarinermik isumaliutersuutinik nutaanik tusagassiivoq. Eqqaasitsissutigissavarpulli nunap sajunneranit eqqugaasut ikiorsiiviginiarlugit aqagu unnukkut Røde Korsip KNR-TV suleqatigalugu katersuiniarluni aallakaatitsinissaq aaqqissuummagu. Katersuiniarneq aqagu ullaakkut radioaviisimi annertunerujussuarmik oqaluttuariumaarparput.
