Umiarsualiorfik aningaasaataarulluni matuvoq
Taamaakkaluartoq Royal Arctic Line-ip pisortaa, Jens Andersen, isumaqarpoq umiarsuit sananeqarneranni 100 millionit missaannik RAL-ip akiliutigeqqaagai annaaneqarnavianngitsut. Isumaqatigiissut naapertorlugu umiarsuit snaneqartut marluusullu 2010-mi aasakkut ukiakkullu Royal Arctic Linemut tunniunneqartussagaluarput. Maannakkulli ilimanarsivoq Royal Arctic Line-p umiarsualiorfimmik allamik sanasussamillu nassarniartariqalernissaa.
Royal Arctic Line-p Pisortaa Jens Andersen naapertorlugu umiarsualiorfik tyskit franskillu sillimmasiisarfissuannut suliatik sillimmasersimavaat, taamaasilluni umiarsuit uagutsinnut tunniunneqanngippata sillimmasiissutit Royal Arctic Linemut akiliutigineqassapput.
Apeqqutigineqarmat sillimaasiisarfiup aningaasat akilerumangippagit qanoq pisoqassanersoq Jens Andersen ima akivoq:
- Soorunami qanoq pisoqarnissaa akiuminaappoq, ajornerpaamik kinguneqassappat 100 millioni koruuninik missaannik piitsuunerulissaagut. Taamaassagaluarpallu aningaasat taakkua katersoqqittariaqassavavut. Taamatulli pisoqarnissaanut takussutissaqaratalu ilimagisaqanngilavut. Isumaqatigiissueqarsimagaannili taamatullu ilisimariinngisanik pisoqartillugu kingunerisinnaasai qulakkersuminaattarput.
Soorumi Royal Arctic Linemi umiarsuit saneqarnerisa kinguaattorfiunerat ajuusaarutigineqaqaaq, taamaatorli assartuinermi akiliutaasartut pisup kingunerisaanik qaffassinnaanerat naatsorsuutigineqanngilaq.
Apeqqutigigakku umiarsualiorfiup tatiginassusia misissorluarneqarsimanersoq Jens Andersen akivoq isumaqatigiissuteqarnerup nalaani umiarsualiorfik nunarsuarmi umiarsuliorfinni tatigisaanerpaanut aningaasarsionikkullu patajaannerpaanut ilaasimasoq. Maannakullu neriuutigineqarpoq ukiup naannginnerani umiasualiorfimmik allamik umiarsuarnik sanasussamik nassaarsinnaanissaq.
Royal Arctic Linemi naatsorsuutigineqarpoq sillimmasiisarfimmiit aningaasat sillimmaasiissutit qaammatit pingasut sisamalluunit ingerlanerini akilerneqarumaartut.
