Umiarsuaatileqatigiiffik politiinut nalunaarutigineqarpoq
Aalisariummi Markusimi inuttat ilaat upernaaq nakkarluni ajunaarpoq.
Isumannaallisaanermut maleruaqqusanik unioqqutitsisimaneq sullivimmillu nalilersuinermik malittarisassaqarsimannginnera pissutaallutik umiarsuaatileqatigiiffik politiinut nalunaarutigineqartoq, Imarsiornermik Nakkutilliisoqarfimmit KNR-imut ilisimatitsissutigineqarpoq.
Aalisariummi atukkat iluarsisariallit arlaqartut Imarsiornermut nakkutilliisoqarfiup paasiniaasartoqatigiivisa nalunaarusiaanni taakkartorneqareerput. Ilaatigut sullivimmik nalilersuinermik malittarisassat amigaatigineqarsimapput, aalisariullu angalanissamut akuersissummik peqarsimanani. Tamannalu umiarsuaatileqatigiiffiup umiarsuullu naalagaata ukiut marluk tikillugit pineqaatissinneqarnerannik kinguneqarsinnaasoq, imarsiornermut nakkutilliisoqarfimmit nalilerneqarpoq.
