Umiarsuaateqarfik politiinut unnerluutigineqarpoq

Umiartortut danskiusut marluk Kujataani nunaqarfiup Saarlup avataani januaarimi ajunaarput, umiarsuaateqarfillu M.H.Simonsen, Svendborgimiittoq, politiinut maanna unnerluutigineqarpoq.
aggustip 14-at 2009 07:49

Umiartortut taakku umiarsuarmit uuliamik assartuummiit, Orasilamiit, umiatsiaaqqamik slangimik uuliamut atortakkamik nassarlutik nunamukartillutik ajunaarput. Nutaarsiassaqartitsivik, Nyhedsbrevet 3F taama allaaserinnippoq.

Pisoq politiinit misissorneqarluareersorlu Imarsiornermik Qullersaqarfik aalajangerpoq umiarsuaateqarfik imaani isumannaallisaanermut inatsimmik arlaleriarluni unioqqutitsisimasutut politiinut unnerluutiginiarlugu. Ajornartoornermi atortunik atuineq ilaatigut amigaateqarpoq, ajunaartullu puttaquteqarnatilluunniit annanniuteqanngillat, Imarsiornermik Qullersaqarfimmiit nalunaarummi allapput.

Ajunaartup aappaa umiarsuarmi saqisuaqqatut ilinniartuusimavoq, 18-inik ukioqarluni, ullullu tallimaannaat Orasilami inuttaavoq.

M.H.Simonsenimi pisortaaneq, Lars H. Simonsen, nutaarsiassaqartitsivimmut Nyhedsbrevet 3F-imut oqaaseqarusunngilaq, Orasilamilu annanniutit amigaataasut pillugit aamma oqaaseqarusunnani.

Ajunaarnerup alianaqisup kingorna immakkut ajutoornermut tunngasumik Qaqortumi nassuiaanermi, takunnissimasoq umiarsuullu naalagaa isumaqarnerarput, umiatsiaaraq sukkavallaarsimasoq, slangilu sukangavallaarsimalluni, taamaammat umiatsiaaraq kinngusimasoq.