Umiarsuaaraq Tunumi kivisoq
Umiarsuaaraq Tunup avataani sisamanngornermi ualikkut kivivoq. Inuttat pingasut annaanneqarput.
Allattoq Malik Brøns
Umiarsuaaqqami inuttat pingasut umiarsuarmi nunniussissutaasumiipput. Inuttat taakku pingasut umiarsuarmit allamit, kivisup ingerlaqatigisaanit annaanneqarput.
Kalaallit Nunaanni Politiit pisumut atatillugu allanik paasissutissaateqanngillat. Politiilli ajunaalernermi kalerrisaarut tigusimallugu uppernarsarpaat. Umiarsuaaqqami inuttat politiinit suli oqaloqatigineqanngillat.
Suliffeqarfiup 60 North Greenlandip umiarsuaaraq pigalugu uppernarsarpaa, pisortarli umiiarneq pillugu oqaaseqarusunngilaq.
KNR-ip Issittumi Sakkutooqarfik oqaaseqartinniaraluarpaa, tamannali iluatsissinnaasimanngilaq.