Ulussaarsuaq IKE sequmeeqaaq
Taama DR-ip radioaviisianut oqarpoq danskeq Houstonimi ambulancemik ingerlatsisartoq Joshua Henrik Madsen.
Sineriammi illoqarfiit marluk Galveston aamma Houston sequmissimaqaat inuppassuillu ikilersimaqisut napparsimavinni suliaritittariaqarsimapput.
Præsident Bush erseqqissaateqarpoq Texas ajunaarnersuaqarfiusoq, taamaammallu ikiuigasuartussannik arlariinnik taavunga aallartitsivoq.
Ulussaarsuaq IKE sequtsereqaluni sakkortugaluaqisoq taamaattoq Amerikami oqartussat aarlerisaarinerattuulli ingasatsiginngilaq tassami taakku aarlerisaarigaluarput takorloorneqarsinnaasumiit suli sualunnerujussuussasoq.
Ilaatigut aarlerisaarutaagaluarpoq allaat 7 meteri angullugu immami tassaarsuaqassasoq. Ippassarlu arfininngornermi ulussaarsuup takkunnissaa sioqqullugu inuppassuit najukkaminniit qimagussoreerput.
Tassaarsuaq 7 meterisut ilimasaarutaagaluartoq 4 meteri angumavaa, tamannalumi aamma Galvestonip ulugussaaneranut sualoreeqaaq.
Taavani inuit ikinnerpaamik 1000-t qeqertami tassani eqqugaapput minnerunngitsumittaaq qulimiguullit lastbiilerpassuillu eqqugaallutik. Naallu oqartussat tamaviaaqalutik inunnik qimagussortitsiniaraluartut inuppassuit Texasimi Louisianamilu najugallit 140.000-t angerlarsimaannarnissartik toqqarpaat.
