Ulussaarsuaq IKE sakkortunerpaavoq

Ulussaarsuaq IKE ullaaq manna inuppassualimmut Houstonimut annguppoq taamalu qarmarsuit uppikaatillugit imaliliortorsuarmik sakkortoqisumik anoraasuartarpoq, tamanna Mexicop kangerliumarnganut ajunaarnersuarmik pilersitsissasoq oqaatiginiarneqarpoq, taamalu USA´p illoqarfiisa anginerit sisamaat suujunnaarsissallugu.
septembarip 13-at 2008 16:52

IKE-p Amerikamiut uuliamik tunisassiornerisa tallimararterutaat maanna sequmereerpaa, tassami ulussaarsuaq kategori 2-tut sakkortussuseqarpoq akunnerullu ataatsip iluani 175 km-isut anoraasuartarluni, taama USA-mi ulussaarsuit pillugit qitiusoqarfik nalunaarpoq.

IKE nunamut ilummukaraluttuinnarnini ilutigalugu ullup ingerlanerani sakkukilliartussangatinneqarpoq ilimagineqarluni katerigori 1-imut anoraa apparumaartoq.

Præsident George W Bush ullumi erseqqissaavoq IKE ima sakkortutigisoq nammineq nuna aallaavini Texas ima annertutigisumik sequmittoq allaat Texasip sanilia Louisiana angumaneqalerluni.

IKE-p sakkortussusersuata Texasimi innuttaasut tupaallatseqai. Ukiullu 100-t ingerlaneranni aatsaat taama sakkortutigisumik ulussaarsuartoqartoq oqaatiginiarneqarpoq, IKE ulussaarsuarmut Katrinamut 2005-imilu New Orleansimik aseruisumut sanilliullugu sakkortunerujussuusimavoq.

Amerikami oqartussat mianersoqqusipput inuit qimagussimanngitsut ulussaarsuup toqumik naleqarsinnaanera pillugu illuminni isersimaannaqqullugit.

Illut 100.000-t ulugutitinnissaat suli aarleqqutigineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq