Ulussaarsuaq Ike Cubamut annguppoq
Ulussaarsuaq Ike Cubap avannaq-kangisissortaanut unnuaq annguppoq, Cubamiullu 1 millionit inigisaminnit qimagussorneqarput. Caraibiami qeqertat aqqusaarlugit ingerlaarnermini ulussaarsuaq Ike inuit 73-it inuunerannik akeqarpoq.
Allattoq Mads Lynge
Ulussaarsuit sakkortussusaat immikkoortunut tallimanut agguarneqartarput, sakkortussuseq 1 sakkukinnerpaajulluni sakkortussuserlu 5 sakkortunerpaajulluni.
Ike Cubamut anngummat sakkortussuseq 3-miippoq, anorillu akunnermut 195 kilometerinik sakkortussuseqarlutik.
Sialussuarpoq, Qeqertallu Turks & Caico aqqusaarneqarmata tamaani illut tallimaagaangata sisamat aseruatiterneqarlutik.