Ulussaarsuaq Filippinerini aseruatiterivoq

Ulussaarsuaq Megi Filippinerit avannarpasinnerusuani aseruatiterivoq, qaqqani marraq sisoortillugu aammalu nunap sineriaani malerujussuaqalersillugu.
Allattoq Apollo Jeremiassen
oktobarip 18-at 2010 10:34

Inuk ataaseq maannamut ajunaartoq oqaatigineqarpoq.

Ulussaarsuaq Megi, nunarsuatsinni ulussaarsuit ulloq manna tikillugu sakkutornersarigaat silasiortut oqaatigaat, aammalu 2006-ip kingornali ulussaarsuarmit aatsaat taama sakkortutigisumik Filippinerit aqqusaarneqarlutik. Inuit 1000-it sinneqartut 2006-imi ajunaarput.

Anorersuaq nunap timaanut ullaap tungaa annguppoq, nalunaaquttap akunneranut 260 kilometerisut sakkortutigaluni. Illut qaliaat teqqarput napparutillu uppikaallutik.

- Illutsinni tigusaaqqasutullusooq misigisimavugut. Anisinnaanngilagut. Anorleqaaq sialleqalunilu. Orpiit sorlaat ilanngullutik teqqarput, nunap immikkoortortaani Isabelami illoqarfiit ilaanni Burgosimi najugalik oqaluttuarpoq.

Ulussaarsuit qulissaata Filippinerit ukioq manna aqqusaarpaat.

- Nuna tamakkerlugu sillimaniarneq annerpaaq maanna atuuppoq, nuna tamakkerlugu politiit oqaaseqartartuat, Agrimero Cruz, nalunaarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq