Ullutsinni kalaallit kinaassusaat sunaava?

Atuakkap "Fra vild til verdensborger" (kalaallisut: nujuartamiit nunarsuarmioqataasumut) sammivaa kalaallit kinaassusaata nunasiaataanermiit ullunut nutaaliaasunut allanngoriartornera.

Kalaaliussuseq pillugu oqallinneq ukiorpassuarni ingerlavoq. Kalaaliussuseq pigiinnarumallugu nunasiaataanerup nalaani ilungersuutiginnittoqarpoq ajoqersuiartortitat kalaallit qilaataat ajorimmassuk, taamanilu oqartarnerattut kalaallit qallunaanngorsagaasimapput.

Maanna kalaaliussuseq nunarsuarmioqataalernermit sunnigaavoq. Taamaattoq ilisarnaatit aalajangersimasut tulaavioqqajaasarput nunani allamiut aperigaangata: Kalaaliussuseq sunaana?

Eqqaaneqarajuttut ilagaat nerisassat kalaalimerngit.

- Kalaaliminernik nerineq immitsinnut allanullu nalunaarneruvoq kinaanitsinnik suminngaanneersunitsinnillu, inuiaat pissusaannik ilinniagartooq Natuk Lund Olsen atuakkami ilanngussamini ilaatigut allappoq.

Kalaaliussutsimik paasinnittaaseq oqallisigineqaleraangat aamma eqqaaneqarajuttarput atisat oqaatsillu. Taakkuli aamma nunatsinni pissutsit allat assigalugit avataaniit sunnigaasimapput.

- Sapakkat, annoraamerngit, ujalussiaq nissiakkalu takutippaat arnaq kusanartulianik atortoq tassaasoq Europamiunit sunnigaasumik inuiaqatigiit ineriartorneranni malinnaasoq, Kulturilerinermi Inuiaqatigiillu oqaluttuarisaaneranni ilinniagartooq Aviâja Rosing Jakobsen ilanngussamini allappoq.

Ilisarnaatilllu tamakku nunarsuarmioqataaleriartornitsinnit sunnigaapput, inuiaat qanga nujuartatut taaneqartartut maanna nunarsuarmioqataalersimammata.

- Namminersulernissap tungaanut tamatumalua kingorna kalaallit kalaaliussuseq ineriartortissimavaat nunarsuarmiut kinaassusaannut takussaaqisumut it atorlugu mumisitsinerup kingorna nunarsuarmi sunniuteqalersimaqisumut, atuakkap aaqqissuisua Ole Høiris, inuiaat pissusaannik ilinniagartooq allappoq.

Taassuma atuagaq aaqqissuussimavaa Ilisimartusarfimmi Kulturimut Inuiaqatigiilerinermullu immikkoortoqarfimmi lektori Ole Marquardt suleqatigalugu.