Ullut naggatissaat pinngitsoorpoq
Genevemi Schweizimiittumi nunap iluani maskiinarsuup 27 kilometerinik takissuseqartup aallartinnerani ullut naggatissaat pilersinneqaratarsinnaasoq, nutaarsiassaqarfinni tamani qaammatini kingullerni ilimasaarutigineqarpoq.
Maskiina taanna stoffit sananeqaataannik minnerpaanik atomitalinnik aallartitsissutaavoq, ateqarlunilu Large Hadron Collider, imaluunniit naalisarlugu LHC.
LHC stoffit sananeqaataannik minnerpaanik atomitalinnik qaamarngup sukkassusia inulaarlugu sukkatigisunik, igeriussisaqattaarluni ullaaq aallartippoq. Taamaaliornerani ilisimatuut nukimmik alliartuaartitsissapput, sananeqaatillu minnerpaat igeriussorlugit. Imminnut aporaatilernerat silaannarsuarmi suut tamarmik pileqqaarneranni qaarnerujussuup kingornagut sekuntialunnguani pisunut eqqaanarsinnaasutut pissasorineqaraluarpoq. Laboratoriap maskiinamik suliarinnittup, CERN-ip, maskiinaa aallartikkunikku ullut naggatissaattut pisoqaratarsinnaanera oqaatigigaluarpaat, maannalu nalunaaquttap akunneri pingasut qaangiussimalereerput.
Aallartitsissutip qernertunik putuaraqartitilernissaata aarlerinassusia qaangiuppoq. Putut qernertut taakkua nunarsuarmik imaaliallaannaq millugussinissaat ilisimatuunit annilaanngatigineqartoq tassa pinngitsoorpoq. Sulimi maaniippugut.
