Ullumikkut ulloq Avatangiiseqarnermut ulloritinneqarpoq

Naalagaaffiit Peqatigiit ulloq juunip tallimaat Nunarsuarmi Avatangiiseqarnerup ulluattut malunnartinniarneqassasoq aalajangersimavaat. Imatut taallugu ”melting ice – a hot topic”, siku aakkiartortoq – qulequtaq kissalaartoq, avatangiiseqarnermut ulloritaq malunnartinniarneqalerpat nunat 100-t sinneqartut peqataassapput.

- Silaannaap allanngoriartorneranut takussutaasinnaasut malunnarnerpaat nunani issittoqarfiusuni annertoorujussuarmik malunniukkiartorput.

Nuna qeriuaannartoq aakkiartuinnarpoq, sermersuarlu naatsorsuutigineqarsinnaan-ngitsumik sukkasoorujussuarmik aakkiartorluni.

Silaannaap allangoriartornera nunap inuiinut pinngortitamik atuisuusunut sunniuteqarnerlussinnaavoq, nerisassaqarniarnikkuinnaanngitsoq aammali kulturikkut kinaassutitsinut atugassarititaasutigut eqquinerlussinnaalluni, taama oqarpoq, Naalagaaffiit Peqatigiinni generalsekretæri, Ban Ki-moon, avatangiisit ullorititaannut atatillugu oqalugiarnermini,.

Illoqarfik Tromsø Norgemiittoq pisortatigoortumik Naalagaaffiit Peqatigiit Nunarsuarmiut Avatangiiseqarnermut ullorititamut atatillugu tikeraarsaasoqarnissaanut toqqarneqarsimavoq, tassanilu pisussat pingaarnerit ingerlanneqartussaapput. Ilaatigut Naalagaaffiit Peqatigiit nalunaarusiami nutaami silaannaap allangoriartornerata nunarsuarmi aputip kiisalu nunarsuarmi sikumut tunngatillugit sunniutaasut ullumikkut Tromsømi saqqummiunneqassapput.

Norgemiut kunngiata Harald-ip Tromsøp toqqarneqar-simanera nuannaarutigeqaa. Naalagaaffiit Peqatigiit nittartagaata saqqummiusai malillugit Kunngi Harald, oqarpoq:

- Nunatut issittoqarfiusutut Norgep kissaatigaa, Nunarsuarmi Avatangiiseqarnermut Ullorititaq pisunik tamanik nunarsuarmi tamarmi eqqarsalersitsisoqarumaartoq.

Silaannaap kissatsikkiartornera inunnit pilersin-neqartoq unammilligassata annersaasa ilagaat, kunngi Harald oqalugiaammini oqarpoq.

Nunarsuarmi ilisimatuut atuarfissuat avannarlerpaaq kiisalu Det Norske Polar Instituti Tromsø-mi inissisimapput.