Ullumi ulloq decembarip 21-at, Ullukinneq, seqernup appariartuinnariarluni qummut aallaqqiffia, siulitta qangarsuaq nalliuttorsiortarfissuarisimavaat.
- Ullukinnersiortarneq nunarsuarmi nunani tamalaani assigiinngitsuni qangarsuarli nalliuttorsiutigineqartarpoq, aamma nunatsinni.
- Nunatsinni itsaq kristumiuussuseq eqqunneqanngikkallarmalli, Ullukinneq nalliuttorsiutigineqartarpoq. Inuit ullormi tassani nerersuartarput, inngertaarlutik, tusserlutik. Seqinersuaq kivigaluttuartoq qummut aallartinniarlugu qinusarsimapput. Ulloq taanna Inuit nutaarsuarnik aamma atisartaartortarsimapput, Karl Elias Olsen nunatta oqaluttuarisaaneranik oqaatsinillu immikkut ilisimasalik Ullukinneq pillugu taama nassuiaateqarpoq.
Ullukinnermi ullorissap ”Aassuutit” ullaakkut nuinera- tassa qaamanermit taallerneqarnera aamma nalliuttorsiutigineqartarpoq. ”Aassuutit” nunani allani ulloriarsiuunit Altair-imik taaneqartarpoq.