Ullumi qinersisoqatuugaluarpat Siumut ajorsassagaluarpoq
2005-imi qinersinermi Inuit Ataqatigiit 22,4 procentinit qinerneqarput, massakkulli qinersisoqartuugaluarpat 44 procentinit qinerneqassagaluarput, partiit akornanni qinerneqarnerpaassagaluarlutik.
Siumut kingullermi qinersinermi 30,4 procentinit qinerneqarsimariarluni maanna 21 procentit missaannit qinerneqassagaluarpoq, naalakkersuisoqataalu Atassutip qinersisai affaannanngussagaluarlutik.
Partiit illuatungiliuttut 61,6 procentinit qinerneqassagaluarput, maanna naalakkersuisoqatigiit 38 procentinit qinerneqassagaluarlutik:
- Atassutip kinguariarnera matumani pissutaanerpaassagaluarpoq, Siumukkummi aalajaatsunik qinersiseqarajupput. Utoqqaat, inuit ilinniarsimanngitsut angutillu Siumukkunnik qinersisartuugajummata, kinguariarneralli innuttaasut nutaamik piumasaqarnerannik takussutissaavoq, Pia Vedel Ankersen Politikenimut oqarpoq.