Ulluliineq akerleraat

Inuit Ataqatigiit siulittaasuata Kuupik Kleistip, soorlu sapaatip akunnerani matumani Radioaviisimi tusaaneqarsinnaasutut, naalakkersuisut siulittaasuata ukiortaami oqalugiaammini namminersulernissaq pillugu taasisitsinissap ukiormanna novembarip 25-annut aalajangiunneqarnera, kisimiilluni tupaallaatiginngilaa.
Allattoq Mads Lynge
januaarip 04-at 2008 15:53

Aamma inatsisartunut ilaasortap, Atassutip namminersorneq pillugu isumalioqatigiissitami ilaasortaatitaata, Augusta Sallingip, ulluliineq qularnartoqartippaa.

- Isumalioqatigiissitap qaqugu sulileqqinnissaa pillugu ilisimatinneqanngilagut. Tassami Folketingimut qinersisoqartussanngormat sulineq unitsinneqarnikuuvoq. Isumalioqatigiissitami sulineq aallarteqqinneqareerpat taasisitsinissamut ulluliinissaq tulluarnerusimassagaluarpoq, Augusta Salling oqarpoq nangillunilu:

- Taasisitsinissaq sioqqullugu tuaviuussaanngitsumik paasisitsiniaanissaq pingaaruteqarluinnarpoq.

Aamma Hans Enoksenip parteeqataa, namminersorneq pillugu isumalioqatigiissitamut ilaasortaq, Folketingimut ilaasortaq Lars-Emil Johansen isumaqarpoq, taasisitsinissap ullulerneqarnissaa utaqqisinneqarsimasinnaagaluartoq. Taassuma pissutsit aallaavigalugit 2009-mi upernaakkut taasisitsinissaq akuersaarsinnaallugu oqaatigaa.

Demokraatit isumalioqatigiissitamut ilaasortaatitaat, Per Berthelsen Sermitsiamut ima oqarpoq:

- Naalakkersuisunaasinuna siulittaasuat pisarnermisut eqqarsarluaqqaarani namminersorneq pillugu isumalioqatigiissitap sulineranut akulerunniarsarisoq, Per Berthelsen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq