Ullorsiutitoqaq nassaarineqartoq erlinnartumik puigukkamik toqqorsimasuuteqartoq
Arktisk Institutimi toqqorsiviup pisortaa, Jørgen Trondhjem ikuallattoornissamut qularnaviikkami torersaanermut atatillugu ullorsiutitoqaq 1761-imeersoq nassaaraa. Ullorsiummimi enhjørningimik toqqorsimasoqartoq paasinarsivoq.
Hans Egedep ernera, Niels Egede angunni ilagalugu ukiut 300-t matuma siorna nunatsinnukartoq ullorsiummik allattuuvoq. Ullorsiut qupperaanni quppernerillu pisoqqat misissuiffigigaanni nunap assinganik assammik titartakkamik, Niels Egedep nammineq 1759-imi tunngaviligaanik Egedesmindetoqqamik takussutissiivoq.
Assilu Niels Egedep titartarsimasaa nalinginnaasuunngilaq. Assimmi sakkutuut nunasiaammik paarsisut kiisalu sumiiffimmi uumasut pingaarnerpaat, matumani enhjørningi ilanngullugu takutinneqarput.
Piffissaq pissanganartoq
Niels Egede aqqanilinnik ukioqarluni Kalaallit Nunaannukarpoq, taamaammat nuna pillugu ilisimannilluarluni. Taassuma nunatsinni 1700-ikkunni niuernermut pingaaruteqartut uumasut ilaatigut soqutigisarai.
Enhjørningillu tuugaava niuerutigineqartuni soqutigineqarluartut ilagaat. Assillu teqeqquani enhjørningip titartarneqarnera Jørgen Trondhjemip maluginiarpaa.
- Assip teqeqquani enhjørningimik titartagarqarnera takullugu quiagivarput – taanna soorunami qilalugaq qernertaavoq, uumasullu allat soorlu, puisi, aaveq, nanorlu aamma titartarneqarput. Enhjørningip titartarneqarnera asseqanngilluinnartuullunilu naliminut ilisaqqunnartuuvoq.
Nunap assinga nunasiaatitoqqamik Egedesmindetoqqamik takussutissiisoq nunap assingani kisiartaasutut ilisimaneqarpoq. Tassani nunasiaateqarneq ukiualuinnarni piuvoq, taannami 1763-imi Aasiaat ullumikkut sumiiffianut nuunneqarpoq.
Naggueqatigiit inuit inuunerannik immikkut ittumik takutitsisoq
Niels Egedep nunatsinni peroriartornera, oqaatsitsinnillu oqaluttarlunilu piorsarsimassutsitsinnik ilisimanninnera immaqa pissutaallutik nunap assinga nunasiaammik uumasunillu allanartunik kisimi takutitsinngilaq.
Nunammi assingata piniartoq puisimik naalileruttortoq kalaalerlu arnaq ileqqutoqaq malillugu qilerteqarlunilu iveruteqartoq aamma takutippai.
- Tamanna Niels Egedep Kalaallit Nunaanni peroriartorsimasup, Kalaallit Nunaannik, piorsarsimassutsimik piniartuunermillu paasisimasaqarluarneranik takussutissiivoq, Jørgen Trondhjem oqarpoq.
Assi titartagaq takorusunneqaruni Arktisk Insitutip toqqorsivianut Københavnimiittumut alakkarneqarsinnaavoq. Institutilli nittartagaani www.arktiskebilleder.dk-mi oqaluttuarisaanermit assilisat, eqqumiitsuliat, nunap assingi takuneqarsinnaapput kiisalu nipitoqqat aamma tusarnaarneqarsinnaallutik.
