Ullormut 1 million koruuni
- Angalasussat mattussinermit eqqorneqartut maanna 2.000-it missaanniilerput, taakkunannga 529-t Kangerlussuarmiit Københavnimut angalanissamut utaqqipput, Københavnimiillu Kangerlussuarmut angalanissamut utaqqisut 551-iullutik, timmisartuutileqatigiiffimmi niuernermut pisortaq Udo Glashoff nittartakkamut takeoff.dk-mut taama oqarpoq.
Nunatsinni illoqarfiit akornanni angalasussat 1.059-it mattussinermit eqqorneqartut timmisartortitseqatigiiffimmit aamma oqaatigineqarpoq.
Nunatsinni ilaasussat ingerlaqqissinnaanngitsut akunnittarfimmiitinissaat ullaakkorsiuteqartinnissaallu Air Greenlandimit isumagineqarpoq, ilaasussallu Københavnimiit nunatsinnukartussat akunnittarfimmiitinneqarnerat, ullaakkorsiuteqartinnerat kiisalu unnukkut nerisaqartinneqarnerat Air Greenlandimit aamma isumagineqarluni.
EU-mi malittarisassat atuuttut naapertorlugit Danmarkimi ilaasussat nerisaqarnissamut unnuiffissaqarnissamullu periarfissaat pitsaanerusut, Udo Glashoffip oqaatigaa.
Air Greenlandip ilaasunik angallassinerminik unitsitsinera sapaatip akunnerata sinneranut atuuttussanngortoq suliffeqarfimmit ippassaq nalunaarutigineqarpoq.
