Ulloq Shiamuslimit ullorsiutaanni pingaarnersaq
Irakimi ullumikkut ulloq aammik kuisiffiusimaqaaq. Shiamuslimit upperisartik malillugu ingerlaaqatigiit nunap ilaani assigiinngitsuni quleriarlutik kikkuunerinik ilisimaneqanngitsunit saassunneqartarsimapput:
Irakimi shiamuslimit ullumikkut upperisartik malillugu ingerlaaqatigiittut assigiinngitsunit saassunneqaqattaarput. Saassussineq sakkortunerpaaq illoqarfimmi Hillah-mi pivoq, taassanimi marloriarluni imminuutigaluni qaartartumeerisoqarneratigut inuit 90-it toqutaammata.
Ualeq manna Hillah-mi pisuinnarnut aqqusinermi inuit nerisassanut pisiniarfinni pisiniarratileruttortut inuit marluk imminnut qaartartumik qaartimmata inuit 90-it toqoqatigaat aamma 140-t ikilerneqarput. Imminuutigaluni qaartitsinerit ullumikkut Irakimi shiamusliminut saassussinerit quliusut ilagiinnarpaat. Aamma illoqarfiit pingaarnersaanni Bagdadimi, ilaatigullu illoqarfinni Tikrit-imi Kerbala-milu shiamuslimit saassunneqartarput.
Ullumikkut saassussisaqattaartoqarneratigut upperisarsioqatigiit marluusut imminnut akersuunnerata sakkortunerulernissaa annilaanngatigineqarpoq.
Ukiup ataatsip matuma siornagut shiamuslimit oqaluffiat Samarra-miittoq qaartinneqarpoq tamatumalu kinguneranik akersuunnerit sakkortuseriarujussuarput.
Massakkut shiamuslimit tuusintilikkaat ulluni 40-ni aliasoreerlutik illoqarfimmut iluartuutitaminnut Kerbala-mut, palasip Husseinip toqunera nalliussiniarlugu ingerlaaleruttorput. Taanna profetip Muuamaap ernutaraa, shiamusliminillu aallarniisuulluni. Ullumikkut ulloq shiamuslimit ullorsiutaanni pingaarnersaavoq.
