Kalaallit politikerit Københavnip Mittarfianiittut: Ulloq pingaaruteqartoq
Atlantikoq qulaallugu timmisartorsuaq Københavnimit nunatsinnukarluni 9.35 qangattarpoq.
Timmisartorsuarlu oqaluttuarisaanermi aatsaat siullermeertumik Kangerlussuarmut minnani Nuummut missaaq.
Timmisartulli qangattannginnerani Danmarks Radiop takornariat ilisarnarluartut arlallit Nuummukartumut ilaanissaminnut piareersimasut naapippai.
Timmisartorsuup tikeqqaarnissaa
Aalisarnermut, piniarnermullu naalakkersuisoq Kim Kielsen angalasut ilagaat, taassumalu timmisartumut ikiartunnginnerani DR-ip oqaaseqartippaa:
- Ulloq pissanganarpoq. Tamanna aallartitsivigeqataaffiginikuuarput. Taamaammat pissanganarpoq.
Naalakkersuisut siulittaasorisimasaat pisimasumik aamma eqqaamasaqarluni Kangerlussuup Los Angelesip akornanni aqqut taamani ammarneqarnera eqqaavaa:
- Ukiut 70-it matuma siorna novembarimi nunatsinnut aqqut ammarneqarpoq. Timmisartuussineq siullerpaaq novembarimi ullaakkut siallersumi, taamani aviisini allapput. Taamaammat pissanganarluinnarpoq.
Nunarsuarmut attaveqalissasoq
Politikeri alla, tassa IA-mit Asii Chemnitz mittarfimmi aamma naapitassaavoq.
Taassuma ernuttani Noa ilagaa, timmisartumullu ikinissaminnut piareersarput.
Taakkulu timmisartumut ikinissartik qilanaarilluinnarpaat.
- Akunnerni tallimani timmisartorluni angerlamut minnissaq isumaqartorujussuuvoq. Nuanneqaaq, oqaluttuarisaanermi pingaaruteqartoq peqataaffigisinnaavarput. Nuannersorujussuuvoq.
Asii Chemnitzilli ernutaatalu sukkanerusumik angerlarsinnaalernerat kisimi pitsaasuunngilaq.
Nunattami sinneranut tamarmut nutaarsiassatsialaasoq taanna oqarpoq:
- Nunatut tikikkuminarnerulissaagut. Tamanna nunarsuarmiunut siaruarsimanermi piffissami pisariaqartilluinnarparput, tassa nunarsuup sinneranut attaveqarnerunitsinni. Taamaammat ulloq pingaaruteqarluinnarpoq.
