Ulloq manna aammattaaq eqqartuussiveqarnermut pingaaruteqarpoq
Nunatsinni eqqartuussiveqarneq ukiut 50-it sinnerlugit atuussimasoq, Folketingimi pingajussaanneerluni ullumi oqallisigineqassaaq, taamalu eqqartuussiveqarnikkut nutarterilluinnarnissaq taasissutigineqassalluni.
Allattoq Louise M. Kleemann
Eqqartuussiveqarneq pillugu ataatsimiititaliarsuup 1994-imi pilersinneqartup suliai innersuussutaalu pineqarput.
Inatsisissatut siunnersuut Inatsisinik atortitsinermut ministerip Lene Espersenip Konservativineersup, ullumikkut saqqummiussaa akuerineqassappat, tamanna aningaasatigut ingerlatsinermut 37 miliuunit koruuninik ukiumut aningaasartuutaanerulissaaq. Tamatuma saniatigut pinerluuteqarsimasunut inissiisarfik matoqqasoq suli aningaasatigut nalilerneqanngitsoq aamma inatsisissamut ilaavoq.