Ulloq kulturisiorfik tassaassaaq septembarip 28-at

Ukioq manna 28. septembarip tungaanut piareersarfiusup sivikinnera pissutigalugu aaqqissuussinerit sapaatiuppamiit 2008-p naanissaanut aaqqissuussinerit pinissaat Naalakkersuisut ammaffigaat.

Eqqumiitsuliat kulturilu qitiutillugit aaqqissuussinissaq eqqarsaatigineqarpoq, ukioq manna ullormi kulturisiorfimmi sammisaq tassaavoq ”Allanngoriartornerup nalaani”. Taama qulequtalimmik allagartarsualiortoqassaaq kommuninut tamanut nassiussuunneqartussanik.

Kommunit tamarmik innuttaasut peqatigalugit kulturikkut aaqqissuussisarnissaannut akisussaasooqquneqarput, taamaattumillu aamma aningaasat nuna tamakkerlugu ullormut kulturisiorfimmut Naalakkersuisut immikkoortitaat kommuunini innuttaasut amerlassusaat aallaavigalugit agguaanneqarumaartut nalunaarutigineqarpoq.

Nuna tamakkerlugu ullormik kulturisiortitsineq nunatsinnut nutaajuvoq, taamaattumik kommunit tamarmik ullormut kulturisiorfiusumut aningaasanik atuinerup kingorna nalunaarusiamik tunniusseqqullugit Naalakkersuisunit qinnuigineqarput. Nalunaarusiat taakku ilaatigut siunissami ullunut kulturisiorfiusussanut isumassarsiorfittut atorneqassapput.