Ulloq kingulleq aalassassimaarfiuvoq

Atassutikkut isumaqarput aningaasat arlaqartut, aalisartunut atorneqartussatut Aalisarnermut Inatsimmut illuartinneqassasut. Tamannalu kinguneqarpoq, illuatungiliuttut tassa partii Siumut, Naalakkersuisunut tatiginnikkunnaarnerminnik saqqummiussinerminnik.

Atassutikkut isumaqarput umiatsiaararsortut periarfissinneqassasut, angallatitaarnissaminnik aningaasanik pisortanik atornermikkut angallatitaarsinnaanissaat. Naalakkersuisut siunnersuuteqarput ukiuni tulliuttuni tallimani, aningaasat katillugit 250.000 milliuuni koruunit Aalisarnermut Inatsimmut illuartinneqassasut. Aningaasat taakku, aalisartunut iluaqutissatut isigineqarmata.

Atassummiit Inatsisartuni ilaasortaq, Knud Kristiansen ima tunngavilersuivoq.

- Uagut pingaarnertut, aalisartunut aningaasalersuinissamut periarfissat ujartornikuuagut. Aalisartut namminneq nunatta karsianinngaaniit aningaasalersorneqartumik, taarsigassarsisinnaanissaat angorusupparputt, Knud Kristensen oqarpoq.

Aningaasanik taamak amerlatigusunik illuartitsisoqarnissaa illuatungiliuttunit paasissutissiissutigineqarsimannginnera, naammagisimaarneqanngilaq. Naalakkersuisut aningaasanik taamak amerlatigisunik illuartitsiniarnerat naammagineqarani, Naalakkersuisunut ualimut tatiginnikkunnaarnermik kinguneqarpoq.

Siumut siulittaasuannit Aleqa Hammondimit oqaatigineqarpoq, suliaq inatsisartunut isertuunneqarsimasoq. Pisoq pillugu, Siumup siulittaasua Aleqa Hammond, ima oqarpoq.

- Nalaattornerinnarmik pisoq aatsaat ippassaq paasivarput, tassa aalisarnermut ataatsimiitsitaliap aalisarnermut naalakkersuisoq aggersarpaa aperalugulu suunuku taakku 250.000 mio. koruunit pineqartut? Taava Naalakkersuisoq oqarpoq, pisoq isertuussimagaluarlugu, aatsaammi aasamut saqqummiukkusussimagaluaramiuk.

Aalisarnermut Naalakkersuisoq Ane Hansen, aalisarnermut inatsip siullermeerneqarnera pillugu oqaaseqartinniarsimagaluarparput, iluatsinngitsumilli.