Ulloq ataatsimiiffik siulleq aporfissartalik
Siumut isumaqarpoq oqaaseqartarnerup sivisussusissaa pillugu siunnersuutip ullormi ataasiinnarmi naammassillugu oqaluuserineqarnera suleriaatsimut akerliussasoq.
Inatsisartut tamatuma kinguninngua ataatsimiinnertik nangeqqippaat Inatsisartut siulittaasuata Josef Motzfeldtip Siumukkut naammagittaalliuutaata isummerfiginissaanut siulittaasoqarfik matoqqasumik ataatsimeeqatigiumallugu aggersareeraalu.
Aleqa Hammondip naammagittaalliuuteqarnermini suleriaaseq innersuussutigpa, tassani allassimammat ullormut oqaluuserisassani oqaluuserisassanngortitaq ataaseq pingasoriarlugu oqaluuserineqartussaasoq siullermeerneqarneraniit aappassaaneerneqarneraniillu sivikinnerpaamik ullut pingasut qaangiussimappata.
Inatsisartut ataatsimiinneq unitsinneqartinnagu oqaluuserisassap ataasiaannarluni oqaluuserineqarnissaanut Inatsisartuni amerlanerussuteqartut taasipput.
17-it isumaqataallutik taasipput isumaqataanngitsoqaranilu. Atassutip Inatsisartuni ilaasortaatitai pingasut aamma Siumumit Akitsinnguaq Olsen taasinngillat. Tassalu Siumup Inatsisartuni ilaasortaatitaasa amerlanersaat taasinermi peqataanngillat.
