Paatsiveeruppaat: Nipisanniaqqusaavugut imaluunniit naamik?

Nuummi aalisartup, Pavia Rasmussenip, nipisanniaqqusaajunnaarnini nukillalaarnaraa.

Taanna sapaatit akunnerata siuliani angusallunniarsimavoq.

- Ullunani makkunani angusallunniarpugut. Nakkutilliisuninngaanniilli ajoraluartumik unitsitaariataarput. Angusalluppassuimmi ulluni makkunani sissamiilernikuupput, taanna oqarpoq.

Angusallunniarneq arnarlunniarnerlu assigiinngissuteqartut, Pavia Rasmussen nassuiaavoq. Angusalluit arnarlunnit mikinerullutillu sissamut qaninnerusarput.

Qassutit nigartakitsut angusallunniussutigisarini, Pavia oqarpoq.

- Ammartariaqarput pinngitsooratik, asuli matuinnarneqarsinnaanngillat, taanna oqarpoq.

Suli nipisanniartoqaqqusaanngimmat nipisanniarneq nipisaarniarnerlu inerteqqutaasoq, Namminersorlutik Oqartussat nalunaarutigaat. Paviallu tamanna nukillalaarnaraa.

Nalunaarutit assigiinngitsut

Paatsiveerunnerannullu tunngavissaqarluarpoq.

Aalisartut Namminersorlutik Oqartussallu nipisanniarnerup ammarnissaata ullulernissaa isumaqatigiissutigisimassappassuk, siusinnerpaamik apriilip aallaqqaataaniit nipisanniartoqaqqusaalissaaq.

Tamannalu aqutsiveqarfinni ataasiakkaani aalisartut tunisassiorfiillu nipisanniarnerup ammarnissaanik Namminersorlutik Oqartussanut noqqaassuteqarnerisigut pissaaq.

Kisianni ukioq kaajallallugu angusallunniartoqaqqusaasoq angusallunniarnerlu aqutsinissamut pilersaarummi uani pineqanngitsoq, Namminersorlutik Oqartussat nipisanniarneq pillugu aqutsinissamut pilersaarutaanni allaqqavoq.

Inuussutissarsiutigalugulu aalisartut juulip ulluisa 16-iat februaarillu ulluisa 28-at akornanni nipisanniaqqusaanngitsut, Namminersorlutik Oqartussat nipisanniarneq pillugu nalunaarutaanni aamma allaqqavoq. Tassa imaappoq, marsip aallaqqaataani nipisanniartoqarsinnaalertarpoq.

Pavia Rasmussenimmi Namminersorlutik Oqartussat marsip ulluisa 25-nni nipisanniaqqusiunnaarnerisa tungaannut taama paasisimagaluarpaa.

Namminersorlutik Oqartussat Sorlernik nipisanniartoqaqqusaannginnera erseqqissarsimasariaqaraluaraat, taanna isumaqarpoq. Arnarlunniarnermi angusallunniarnerluunniit inerteqqutaanersoq erseqqissaatiginngilaat.

- Arnarluit angusalluillu taputartuuneqarpasikkamik, nipisannik allaqqanera pisuulluni, Pavia Rasmussen oqarpoq.

- Innuttaaqatigut piumasaat uagut aalisartarpagut, atorfissaqartitaminnik soorunami pisiortortarput. Aamma ulluni makkunani piumaneqartorujussuupput, taanna oqarpoq.

Tassa tassaavoq

Angusalluilli arnarluillu taputartuussimanngikkitik, Namminersorlutik Oqartussat oqarput.

Nipisanniarnermik sutigut tamatigut matusinertik aalajangiusimagini, aalisarnermut naalakkersuisoqarfik allappoq.

- Aqutsiveqarfimmi naalakkersuisoqarfimmit nipisanniartoqaqqusaalertinnagu nipisanniartoqaqqusaanngitsoq, nalunaarummi allaqqavoq.

- Nipisanniarneq sutigut tamatigut pineqarpoq, aamma angusallunniarneq. Aalisarnermillu inuussutissarsiuteqanngitsut inuussutissarsiutigalugu aalisartut nipisanniaqqusaaneranni taamaallaat aamma nipisanniaqqusaapput, Katrine Kjærsgaard aalisarnermut naalakkersuisoqarfik sinnerlugu oqarpoq.

Tamanna aalisartut paatsiveerunnerannik kinguneqarsimasoq, aalisarnermut naalakkersuisoqarfik ajuusaarutigalugu aamma allappoq. Nalunaarulli taanna 2016-imili atuutilermat aalisartut quarsaarutissaqanngitsut, naalakkersuisoqarfik allappoq.

Peqatigiiffiup malittarisassat ersarissaqqugai

Arnarluit pisarisoortakkat Nuummi Aalisartut Piniartullu Peqatigiiffiat, NAPP, naapertorlugu amerlasanngillat.

Tamanna nipisanniarnermut malittarisassat 2016-imeersut atuutilermatali NAPP naapertorlugu ukiut tamaasa ajornartorsiutaasarpoq. Taamaammat peqatigiiffiup nipisanniarnermut malittarisassat allanngorteqquai.

Tassa imaappoq, angusallunniarnermut arnarlunniarnermullu assigiinngitsunik malittarisassaqartariaqarpoq. Malittarisassammi maanna atuuttut nipisanniarnermut tunngasuummata angusallunniarneq arnarlunniarnerluunniit pineqarnersoq nalunartarpoq, NAPP allappoq.

Aqutsinissamut nutaamik pilersaarutiliortoqareertoq nipisanniarnermullu nalunaarut arnarlunniarnermik angusallunniarnermillu aqutsineq pillugit immikkut nassuiaaserlugu nutarterneqareertoq, aalisarnermut naalakkersuisoqarpoq ilisimatitsivoq.

- Qinersinissarli suaarutigineqarmat, malittarisassat taakku nipisanniarfissanngortinnagu akuerineqarsinnaasimanngillat. Aappaaguli nipisanniarfiusussami atuunnissaannut akuerisassanngorlugit qinersereernermi Naalakkersuisunngortunut saqqummiunnissaat pilersaarutaavoq, naalakkersuisoqarfik allappoq.