Ukrainemi præsidentimut qinersisoqarpoq
Manna tikillugu qinersisut 90 procentiisa missaanniittut kisinneqarsimalerput.
Qinersineq Ukrainemut pingaaruteqarpoq, soorlu nunap sumut sammilernissaa takutinniarneqartoq, Ruslandimut saattoqassanersoq imaluunniit Ruslandip Europallu akornannut. Tamatumunngalu peqatigitillugu ukiut tallimat matuma siornatigut akerliussutsimik takutitsisoqarmalli neriorsuutit eqqortinneqanngitsut pillugit qinersisartut paatsiveerusimaarlutik.
Maannakkut pissutsit taamatut isikkoqartillugit kina Ukrainemi præsidentinngussanersoq Jes Højen aperineqarami akivoq:
- Tamatumani naligiittorujussuusutut isikkoqarput, Viktor Janukovitj siullermik qinersisoqarmalli assut siuariaateqarpoq, kisiannili Julia Timosjenko iluatsitsissaguni ukiut tallimat matuma siornatigut akerliussutsimik takutitsisunit tapersersorneqassaguni taava marluullutik 50-50-imik angusaqarnissaat ilimanaatilerujussuuvoq.
Qinigassanngortittut marluullutik peqquserluttoqarsimaneranik imminnut pasilleqattaatilereermata, tamanna ajornartorsiutaassanersoq aperineqarami akivoq:
- Oqartoqarsinnaavoq taakkua arlaannarmilluunniit ajugaanissaa akueriuminaatseqigaat, Julia Timosjenkomi oqarpoq Janukovitjip qinersineq pissarsiariniaraa, tassami taassuma parlamentimi suleqataasa qinersinermut inatsit qanittukkut allanngortimmassuk, taamaaliortoqarpallu nutaamik akerliussutsimik ingerlatsiniarluni. Janukovitjip aamma illersortini maani Kievip aqqusernini 100-likkuutaat katersorpai, taakkualu sulerinersut ilisimaneqarpiaratik, kikkulli tamarmik oqarput taakkua Janukovitjip Ruslandip nunanut immikkoortortaanit russisut oqaluttuneersut russinillu illersuisuneersut katersorsimassagai.
Julia Timosjenkop qinersinermi ajorsarnini suli nassuerutigiumanngilaa. Taanna siusinnerusukkut qinersinerup inernera eqqartuussivimmut misissorluarteqqullugu imaluunniit imminik illersuisut aqqusinermi ingerlaartilerniarlugit sioorasaarivoq, minnerpaamilluunniit paasinarsissagaluarpat qinersinermi peqquserluttoqarsimasoq. Taama Ritzau allappoq.
Europami isumannaallisaarnermut suleqatigiinnermullu kattuffiup OSCE-p ualiatungaani qinersineq kiffaanngissuseqarfiunersoq naapertuilluartuunersorlu nalilissavaa.
Ukrainemi præsidentimut 2004-mi qinersineq peqquserluttuliorfiuvoq, taamanikkullu Janukovitjip pissaaneq allamut tunniullugu.
