Ukrainemi naalakkersuinikkut ajornartorsiulerput
Ukrainip præsidentia, Viktor Jusjtjenko, naalakkersuinikkut mumisitsisoqalernerarlugu qinersisitsiniarluni aarlerisaarivoq.
Sakkunik Georgiamut pilersuisimaneq pillugu assortuuttoqareersorlu præsidentip partiia naalakkersuisooqatigiinniit tunuarpoq. Taamaalillutik illuatungiliuttut Ruslandimik tapersersuisut pissaaneqarnerulerput.
Georgiap Ruslandillu sorsuutileraluarneranni Ukrainep Georgiamut sakkunik pilersuinera inatsisinik unioqqutitsinerungitsoq, præsidentip tapersersortai isumaqarput. Illuatungiliuttulli ataatsimiititaliarsuarmik, pisimasunik misissuisussamik, pilersitsipput.
Præsidenti qinersisitsiniassaguni ullut qulit qaangiutsinnagit tamanna nalunaarutigiumaaraa, Ritzau nalunaarpoq.