Ukrainemi atomimik nukissiorfimmi atomiliuutit ilaat qaminneqartoq
Ukrainemi atomimik nukissiorfimmi Zaporizjzjami, russit sakkutuuisa nakkutigisaanni, atomiliuutini suli ingerlasuni aappaa qaminneqarpoq.
Russit qaartartunik saassussereersullu taama pisoqarpoq.
Ukrainemi nukissiofik Energoatom taama paasissutissiivoq.
Naalagaaffiit Peqatigiit atomip nukinganik atuinermik nakkutilliisitaat atomimik nukissiorfiliarniarsarileruttorput.
Atomimik nukissiorfik ajoquserneqarpat atomimik ajunaarnersuaqarnissaa ernummatigineqarpoq.
Nukissiorfik taanna arfinilinnik atomiliuuteqarpoq, taakkunanngalu marluk kisimik ingerlapput.
AAMMA ATUARUK Nakkutilliisitat atomip nukinganik nukissiorfimmut misissuiartorlutik Ukrainemut tikittut
Russit nutaarsiassaqartitsiviata Tassip allaaserisaa napertorlugu ukrainemiut akornusiiniarlutik aserorterisut atomimik nukissiorfik tiguarniarsimagaluarpaat. Sakkutuut taakku atomimik nukissiorfimmit 2,5 kilometerisut ungasitsigisumut nunnitsinneqarsimapput nukissiorfimmut qanillatupallassimallutik.
Ukrainemiut sakkutuuisa siuttuat Oleksandr Starukh taama nalunaarpoq.
Naalagaaffiit Peqatigiit atomip nukinganik atuinermik nakkutilliisitaasa atomimik nukissiorfiup tungaanut aqqutigisassaat russit sakkutuuinit eqqaassiffigineqarpoq.
Naalagaaffiit Peqatigiit atomip nukinganik atuinermik nakkutilliisitaat ullumi sisamanngornermi nukissiorfimmut tassunga oqallisaaqisumut ingerlaarput.
Rusland Ukrainelu atomimik nukissiorfimmut saassussisutut imminnut pisuuteqattaapput.
Naalagaaffiit Peqatigiit atomip nukinganik atuinermik nakkutilliisitaasa susoqarnersoq uppernarartussaavaat.