Ukiut nikinnerat pinartoqanngitsoq
Politiit ukiut nikinneranni ulapaareerlutik maanna pisut malinnaaffigisinnaanerulerpaat.
Inuit marluk inatsit tunngaviusoq naapertorlugu killisiorneqarsimapput, tamarmik nakuusersimasutut unnerluutigineqarlutik.
Nakuusernerit taakku tamarmik, Tasiilap nunaqarfiini assigiinngitsuni marluni pisimapput.
Unnerluutigineqartut marluusut sapaatip akunnerini sisamani tigummineqarallartussanngortinneqarput.
Misissueqqissaarneq pissutigalugu ilisimannittullu sunnerneqannginnissaat pissutigalugu politimesterip tulliata Bjørn Bayip pisimasut annerusumik oqaaseqarfigerusunngilai.
- Taamaattorli pisimasuni marlunni nakuusertoq nakuuserfigineqartorlu imminnut ilisarisimapput – tassa nakuusernerit nalaatsornerinnakkut pinngillat, Bjørn Bay oqarpoq.
Pisut taakku saniatigut ukiut nikinneranni unnerluutiginninnerit arlalissuupput – aqqusinermi eqqissiviilliortitsinerniit nakuusernerit annikinnerusut aamma kinguaassiuutitigut pinerluuteqarnerit minnerusut, suli misissuiffigineqarput.
