Ukiup frimærkitsialaa 2009 toqqarneqarpoq

Kikkulluunniit taaseqataarusuttut POST Greenlandip 2009-mi frimærkit saqqummersitaasa 22-t akornanni qaammatini kingullerni toqqaasinnaatitaapput. Frimærki ajugaasoq tassaavoq G428, tassani takuneqarsinnaavoq, nunatta kujataani aasap nunaani kusanaqisumi, inuit ilaannit nunatta naasuanik taaneqartartoq, Niviarsiaq, assimi salliulluni inissisimasoq, tunuliaqutaralugulu Kalaallit Nunaata sermersuaqarfippassuisa ilaat. Asseq Narsameersup John Rasmussen-ip assilisaraa. Frimærki 16. september 2009 saqqummersinneqartoq, immikkut qulequtserlugit “SEPAC-ip - Pinngortitaq”-mik qulequtserlugit saqqummersitttagaasa appassaraat. SEPAC tassaavoq De Små Europæiske Postvæsners Samarbejde (Europami Allakkeriveeqqat Suleqatigiiffiat) POST Greenlandip peqataaffigisaa. Frimærki naleqarpoq DKK 7,00. Dorit Olsen ilioqqaasuuvoq.

2009-mi kalaallit frimærkiliaannik kusanarnerpaamik toqqaanissaq novemberimi aallartippoq marsip aappaani naammassivoq.

Taasisinnaaneq ammaneqarmalli nunarsuarmit tamarmit taasisoqartuarsimavoq, taasisullu akornanni 10.000 koruuninnattussamik makitsisoqarmat ajugaavoq Birgit Ømark Danmarkimi Espergærde-meersoq. Taassuma saniatigut Ukiup 2009 mappianik inuit qulit pinnapput.