Ukiup ataatsip naannginnerani eqqisseqatigiissapput
Isumaqatigiinneq eqqissinissaq anguniarlugu isumaqatiginninniarnerni Annapolis-imi USA-mi ingerlanneqartuni pivoq. Isumaqatigiissutaavoq Israel Palæstinalu ukioq naatinnagu eqqisseqatigiissasut.
Illua’tungeriilli Jerusalem pillugu piumasaqaatiminnik angusaqarniarlutik malartaaserput, killeqarfissat inississorneqarnissaat palæstinamiullu qimaasorpassuit siunissaat malartaasersutaapputtaaq. Isumaqatiginninniarnerulli sinaakutassai tusarliunneqareersut Israelip minitseriunera nalunaarpoq isumaqatigiissutaasut piviusorsiunngitsut.
Kangiani qiterlermi eqqisseqatigiinnissamik isumaqatigiissuteqartoqaqqaammersoq Israel-ip timmisartui Gazami Hamasip sakkutuuinik saassussipput. Saassussineq akiniaanertut taneqarpoq, Hamas-imi ataasinngormat marlunngormallu qaartartunik igeriuttakkanik sakkulerlutik saassussipput.
Hamas Israel-imik akuerinninngitsoq Palæstinamiut inatsisartuiini amerlanerussuteqartut Annapolis-imi isumaqatiginninniarnernut qaaqqusaanngillat, marlunngormallu Gaza-mi Vestbredden-imilu palæstinamiut isumaqatiginninniarnernut akerliussutsiminnik takutitsipput.
Eqqissinissamik isumaqatiginninniarnerit Moskvami nanginneqassasut Ruslandip nunanut allanut ministeriata nalunaarutigaa.