Ukiup affaani kingullermi maanna aatsaat taama USAmi tunillatsittoqartigaaq

Ukiup affaata kingulliup ingerlanerani sisamanngornermi aatsaat taama USAmi ulluinnarmut tunillatsittoqartigaaq, 100.000it sinnerlugit tunillatsillutik.

Virusi tunillajasooq Delta Floridami naalagaaffinnilu allani, akiuussutissamik kapissimasoqarpianngitsuni tunillaassuulluni.
Sapaatip akunnerata kingulliup ingerlanerinnaani, USAmi agguaqatigiissillugu ullormut 95.000it tunillatsissimasut nalunaarsorneqarput. Tassa qaammatip ataasip ingerlanerannaani tunillatsittut tallimariaatinngorlutik.

USAmi naalakkersuisut covid-19 pillugu ataqatigiissaarisuat Jeff Zients oqarpoq, naalagaaffiit arfineq marluk, tassa Florida, Texas, Missouri, Arkansas, Louisiana, Alabama kiisalu Mississippi, sapaatip akunnerani kingullermi USAmi tamani tunillatsittut napparsimmavinnullu unittut tamarmik affaat, naalagaaffinnit taakkunaneersuupput.

Naalagaaffiit taakkua aamma akiuussutissamik kapitissimasut USAmi ikinnerpaat, naalagaaffinni taakkunani najugaqarput.

Pissutsit tamakkua pissutigalugit, amerikamiut namminneq nappaatinut akiuussutissaqarpianngitsut, pingajussaanik kapitinnissaat, amerikamiut naalakkersuisuisa neqeroorutiginiarpaat. Nappaatit tunillaassuuttarneri pillugit USAmi misissuisut pisortaat, Anthony Fauci, sisamanngormat taamatut oqarpoq.

Pingasunngormat Faucip aarlerisaarutigereerpaa, sapaatip akunnerini tulliuttuni Delta-virusimik tunillatsittut ullormut 200.000t pallittalernissaat.

USAp saniatigut aamma Tysklandip, Frankrigip Israelillu naalakkersuisuisa coronavirusimut akiuussutissamik pingajussaanik kapitittarnissaq neqeroorutigilersaarpaat. Taamatut pisoqarpoq, naak nunarsuatsinni peqqinnissaq pillugu suliniaqatigiiffiup, WHOp innersuussutigingaluaraa, tamanna utaqqissuteqqullugu, nunarsuatsinni inuit amerlanerusut siullermeerlutik akiuussutissamik sinneruttumik kapitinnissaasa tungaanut.

USAmi naalagaaffinni Floridami tunillatsissimasut napparsimmavinni uninngasut maanna amerlanersaapput. Naalagaaffik taanna USAmi innuttaqarnerpaat pingajoraat.

Floridami napparsimmavinni uninngasut sisamanngormat 12.373iupput, tassa coronap tuniluutilerneraniit aatsaat taama unerartut amerlatigalutik.

USAP peqqinnissaq pillugu qullersaqarfiata paasissutissaataani tamanna takuneqarsinnaavoq.

Naalagaaffinnut allanut sanilliullugu aamma tassani meeqqat coronarlutik napparsimmavinnut unerartut amerlanersaapput, Arkansasimi kiisalu Texasip ilaani aamma tunillatsittorpassuit ilungersuutigaat.

USAmi naalagaaffinni talerperliuniarfinni qeqqatalu kitaaneersut inuusunnerit, piitsut akiuussutissamillu kapitinnissaminnut nangaasut akiuussutissamik kapitinnissaat, Joe Bidenip naalakkersuisuisalu ilungersuutigaat.

Tunillatsittut amerliartuinnarnerisa kinguneranik, namminersortut suliffeqarfiutaasa sulisumik sullitamillu akiuussutissamik kapitissimanissaat piumasaqaatigisalerpaat. Suliffeqarfiit arlallit aamma sulisumik allaffinnut uternissaat pilersaarutigilerpaat.