Ukiup aappaata affaani isertitsivimmiittussanngorpoq

Angut 20-nik ukiulik imigassartorsimalluni sisamanik ilaasoqarluni Nuummi mittarfimmut aqqutaani decembarip 13-ianni biilertilluni, nivissanik marlunnik apuivoq. Aportittup aappaa toquvoq, aappaalu aqqunartitersimaqigami Danmarkimi suliarineqartariaqalerluni.

Angut 20-nik ukiulik eqqartuunneqarnermini oqaluttuarpoq, apuinermi kingorna tupassimaqigami, ikiuisussanik kalerreeqqaarani qimaaginnarsimalluni.

Decembarimi apuinermi saniatigut assigiinngitsutigut 15-eriarluni inatsisinik unioqqutitsisarsimalluni nassuerpoq. Ilaatigut pingasoriarluni aanngajaarniutit pillugit inatsisit unioqqutittarsimavai marloriarlunilu biilersinnaanermut inatsisit unioqqutittarsimallugit.

20-nik ukiulik eqqartuunneqarnermini nipikisaarluni 15-eriarluni inatsisinik unioqqutitsisarsimanini nassuerutigigamigit, ukiup aappaata affaani isertitsivimmiittussanngortinneqarnermi saniatigut, 15.000 koruuninik akiliisussanngortineqarpoq, ukiunilu tallimani biileqqusaajunnaarluni.

Unnerluussisoq illersuisorlu tamarmik pineqaatissiissummik ingerlatitseqqissanerlutik ulluni 14-ini eqqarsarfissaqartinneqarumapput.