Ukiumi nutaami pilersaarusiornissamut piffissanngorpoq
Pujortassaarniarpunga, saningorsarniarpunga, imernikinnerulerniarpunga, aningaasanik sipaarnerulerniarpunga, tassa tamakkua inuit ilaasa ukiumi nutaami anguniassallugit pilersaarutigisartagaat.
Siornatigut Ulla Kristiansenip ukiumi nutaami pilersaarutini piviusunngortinngitsoorsimagamiuk, ukiumi nutaami pilersaarusiornissaminik mianersorpoq, kisianni aaliangersimasumik ukioq 2012-mut kissaateqarpoq:
- Ukiumi nutaami suli pilersaaruteqanngilanga, kisianni nerisakka mianersuukkusunneruvakka. Maannakkut ilinniartuugama kissaatigeqaara ilinniarnera ajunngitsumik ingerlassasoq.
Ukiumi nutaami pilersaarusiortarneq demokraatit siulittaasuata Jens B. Frederiksenip atungarinngilaa, kisianni ukioq 2012-mut immikkut ittumik nuliaminut tunngatillugu kissaateqarpoq:
- Neriuutigeqaara 2012-mi ilaqutakkalu inuulluarnissarput, ajunngitsumik ingerlanissarput. Nuliannguara suli kræftimut misissortittarami, neriuutigeqaara ingerlalluassasoq.
Ukiumi nutaami pilersaaruteqartut ilagaat nuummioq Andreas Kleinschmidt, taanna aaliangersimasumik anguniagaqarpoq:
- Pilersaaruteqarpunga saningorsarnissannut, nerisakka annikillisissavakka pisunnerulerlugalu.
Politikkerit ilaat siumumi ilaasortaq Finn Karlsen ataatsimiigialersoq aperivarput, taanna aaliangersimalluinnartumik ukioq 2012-mut anguniagaqarpoq:
- Pilersaarutigaara arsamik sungiusaasutut GSS-imi ukioq 2012-mi anguniagaqassalluga, tassami ukiorpassuarmi aatsaat arsamik sungiusaasunngoqqikkama.
Ukiumi nutaami pilersaarusiortarneq kattusseqatigiinneersup Anthon Frederiksenip ileqqorivaa, sunillu pilersaaruteqarnerluni oqaluttuarpoq:
- Inuttut imminut paarilluarnerulernissara eqqarsaatigivara. Qujanartumik qangarsuarli tupa taamaatinnikuuvara aamma imigassap ingalassimanissaa ukiumi tullermi eqqarsaatigivara, pingaartumik pinaveersaarniarlugu peqqissutsimut sunniuteqarlussinnaasarnera eqqarsaatigalugu.
Ilanngutassiami suliarinnittut Kristine F. Petersen Jette Andersenillu ukiumilu nutaami marluullutik pilersaaruteqanngillat.
