Ukiukitsunik atornerluisarneq biskorpiunernit isertuunneqarsimavoq
Katuullit oqaluffianni kinguaassiutitigut atornerluisarneq isertuunneqarsimasoq, nalunaarusiarsuarmi saqqummiunneqaqqammisumi allaaserineqartoq, dr.dk-mi allappoq.
Illoqarfimmi Dublinimi palasit ukiukitsunik 1974-mit 2004-p tungaanut kinguaassiutitigut atornerluisarsimanerat, biskorpiunernit pingasunit isertuunneqartarsimavoq.
Palasit ukiukitsunik atornerluisarsimasutut pasineqaleraangasa allamut nuutillugit palasinngortinneqartarsimapput taamaalillutillu palasit kanngunartuliornerat ukiuni arlaqartuni ersertuunneqarsinnaasarsimalluni.
- Kanngunartuliorsimanermut akisussaasut akisussaatinneqassapput, pisunillu taamaattumik pisoqaqqissanngitsoq irlandimi innuttaasut paasissaagaat, Irlandimi naalakkersuisut nalunaarusiami taama oqariartuuteqarput.
Meeqqat 320-t palasinit 46-nit atornerlunneqarsimanertik pillugu nalunaaruteqartuusimapput, nalunaarusiornermilu ataatsimiititaliaq isumaqarpoq, qularutissaanngitsumik meeqqat amerlanerujussuit atornerlunneqarsimassasut.
Palasit atornerluisarsimasut allaaserineqarneranni paasineqarpoq, palasit ilaat meeqqanik 100-nik atornerluisarsimalluni nassiuersimasoq, ataaserlu ukiuni 25-ni atornerluisarsimasutut nassuersimasoq aamma allaaserineqarpoq.
Ukiukitsunik atornerluisarneq pillugu biskorpiunerit siornatigut ilisimasaqannginnerartarsimapput, ataatsimiititalialli misissueqqissaarneratigut paasineqarpoq, atornerluisarneq pillugu politiinut tunniussisoqartussanngoraangat biskorpiunerit sillimmatinik pisisarsimasut, taamaalillutik atornerluisarnerit politiinut nalunaarutigineqanngitsoortarsimallutik. Sillimmasiisarfiillu biskorpiunernit pisiniarfineqartarsimanerat pappiliatigut uppernarsaatissaqartoq, ataatsimiitialiaq misissuigasuarsimasoq allappoq.
Irlandimi naalakkersuisut maajimi nalunaarusiaq saqqummiummassuk aamma paasineqarpoq, katuullit atuarfianni meeqqallu angerlarsimaffianni meeqqat 12.000-it atornerlunneqarsimasut katillugit 7 milliardit koruuninik taarsiiffigineqarsimasut.
